തിരുവനന്തപുരം: ഡ്രൈവിങ് ടെസ്റ്റ് പാസാകുന്നവര്ക്ക് താമസമില്ലാതെ തത്സമയം ലൈസന്സ് ലഭിക്കുന്ന സംവിധാനം നടപ്പാക്കാനൊരുങ്ങി മോട്ടോര് വാഹന വകുപ്പ്. ടെസ്റ്റ് ഫലം തല്സമയം സാരഥി സോഫ്റ്റ്വെയറില് ഉള്ക്കൊള്ളിച്ച് ലൈസന്സ് നല്കുന്ന രീതിയിലാണ് പുതിയ ക്രമീകരണം. ഈ സംവിധാനം ഉടന് നടപ്പാകും. ഇതിനായി മോട്ടോര് വാഹന വകുപ്പ് ഉദ്യോഗസ്ഥര്ക്ക് 294 ലാപ്ടോപ്പുകള് വാങ്ങാന് ഒന്നരക്കോടി രൂപ അനുവദിച്ചു.
നിലവില് ടെസ്റ്റ് ഗ്രൗണ്ടുകളില് നിന്ന് വെഹിക്കിള് ഇന്സ്പെക്ടര്മാര് ഓഫീസില് എത്തിയ ശേഷമാണ് ലൈസന്സ് അനുവദിക്കുന്നത്. രാവിലെ ടെസ്റ്റ് നടന്നാലും ലൈസന്സ് വിതരണം വൈകും. പുതിയ സംവിധാനം വരുന്നതോടെ ടെസ്റ്റ് ഫലം ആ സമയത്ത് തന്നെ ഓണ്ലൈനില് ഉള്ക്കൊള്ളിക്കും. പാസാകുന്നവര്ക്ക് ഉടന്തന്നെ ഡ്രൈവിങ് ലൈസന്സ് ഓണ്ലൈനില് എടുക്കാനാകും.
