ന്യൂഡൽഹി: ചരക്ക് സേവന നികുതി (ജിഎസ്ടി) ഘടനയിൽ വൻ മാറ്റങ്ങൾ വരുത്തിക്കൊണ്ട് കേന്ദ്ര സർക്കാർ. നിലവിലുള്ള സ്ലാബുകൾക്ക് പകരം ഇനി മുതൽ രണ്ട് നികുതി സ്ലാബുകൾ മാത്രമായിരിക്കും. ഇത് സംബന്ധിച്ച തീരുമാനം ജിഎസ്ടി കൗൺസിലിന്റെ പ്രത്യേക യോഗത്തിൽ കൈക്കൊണ്ടതായി കേന്ദ്ര ധനമന്ത്രി നിർമ്മല സീതാരാമൻ അറിയിച്ചു. പുതുക്കിയ നിരക്കുകൾ സെപ്റ്റംബർ 22 മുതൽ പ്രാബല്യത്തിൽ വരും.
ഈ മാറ്റം സാധാരണക്കാർക്ക് വലിയ ആശ്വാസമാകുമെന്നാണ് പ്രതീക്ഷിക്കുന്നത്. 175 ഉൽപ്പന്നങ്ങളുടെ നികുതി നിരക്കിൽ കുറവ് വരുത്തിയിട്ടുണ്ട്. ഇതിൽ വസ്ത്രങ്ങൾ, ഹെയർ ഓയിൽ, സോപ്പ്, ഷാംപൂ തുടങ്ങിയവ ഉൾപ്പെടുന്നു. ഇവയുടെ നികുതി 5% ആയി നിജപ്പെടുത്തിയിട്ടുണ്ട്. അതേസമയം, എസി, റഫ്രിജറേറ്റർ തുടങ്ങിയ ആഡംബര വസ്തുക്കളുടെ നികുതി 18% ആയിരിക്കും. നിർമ്മാണ മേഖലയ്ക്ക് ഉണർവ്വ് നൽകിക്കൊണ്ട് സിമന്റിന്റെ വിലയിലും കുറവുണ്ടാകും.
കൂടാതെ, പാൽ, കടല, ഇന്ത്യൻ നിർമ്മിത ബ്രെഡ് തുടങ്ങിയ അവശ്യ ഉൽപ്പന്നങ്ങളെ നികുതിയിൽ നിന്ന് പൂർണ്ണമായും ഒഴിവാക്കിയിട്ടുണ്ട്. ഇത് കാർഷിക മേഖലയ്ക്കും സാധാരണക്കാർക്കും ഏറെ ഗുണകരമാകുമെന്നാണ് വിലയിരുത്തൽ. ജിഎസ്ടി ഘടനയിലെ ഈ മാറ്റം വിവേചനപരമല്ലെന്നും, ഇത് ജിഎസ്ടി സംവിധാനം കൂടുതൽ ലളിതവും കാര്യക്ഷമവുമാക്കാൻ ലക്ഷ്യമിട്ടുള്ള ഒരു ഘടനാപരമായ പരിഷ്കാരമാണെന്നും ധനമന്ത്രി വ്യക്തമാക്കി.
ജിഎസ്ടി കൗൺസിലിലെ എല്ലാ അംഗങ്ങളുടെയും കൂട്ടായ പരിശ്രമത്തിന്റെ ഫലമായാണ് ഈ നിർണ്ണായക തീരുമാനം എടുത്തതെന്നും ധനമന്ത്രി കൂട്ടിച്ചേർത്തു. പുതിയ പരിഷ്കാരങ്ങൾ സമ്പദ്വ്യവസ്ഥയുടെ വളർച്ചയ്ക്ക് സഹായകമാകുമെന്ന് പ്രതീക്ഷിക്കുന്നു
