കേരളം

കെട്ടിടം പൊളിക്കുന്നതിനിടെ തകര്‍ന്നുവീണുണ്ടായ അപകടത്തില്‍ രണ്ടുപേര്‍ മരിച്ചു

By enews web desk 26 October,2022

കൊച്ചി മരടില്‍ കെട്ടിടം പൊളിക്കുന്നതിനിടെ തകര്‍ന്നുവീണുണ്ടായ അപകടത്തില്‍ രണ്ടുപേര്‍ മരിച്ചു.ഒഡീഷ സ്വദേശികളായ ശങ്കര്‍, സുശാന്ത്കുമാര്‍ എന്നിവരാണ് മരിച്ചത്.മതിയായ സുരക്ഷ ഒരുക്കാതെ കെട്ടിടം പൊളിച്ചതിന് കരാറുകാരനെതിരെ കേസെടുക്കുമെന്ന് മരട് പോലീസ് അറിയിച്ചു.

മരടിലെ ഷോപ്പിംഗ് മാളിനു സമീപത്തെ ഇരുനിലകെട്ടിടമാണ് പൊളിക്കുന്നതിനിടെ തകര്‍ന്നുവീണത്.രാവിലെ 11 മണിയോടെയായിരുന്നു അപകടം.ഇതര സംസ്ഥാനക്കാരായ അഞ്ചു തൊഴിലാളികള്‍ ഈ സമയം ഇവിടെയുണ്ടായിരുന്നു.ഇതില്‍ രണ്ടുപേരാണ് അപകടത്തില്‍പ്പെട്ടത്.സ്ലാബിനടിയില്‍പ്പെട്ട രണ്ടുപേരെ നാട്ടുകാരും ഫയര്‍ഫോഴ്സും പോലീസും ചേര്‍ന്ന് പുറത്തെടുത്ത് ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ലെന്ന് രക്ഷാപ്രവര്‍ത്തനത്തില്‍ പങ്കാളിയായ നവാസ് പറഞ്ഞു.

ഒഡീഷ സ്വദേശികളായ സുശാന്ത്കുമാര്‍ ,ശങ്കര്‍ എന്നിവരാണ് മരിച്ചത്.സ്വകാര്യ വ്യക്തിയുടെ ഉടമസ്ഥതയിലുള്ളതാണ് കെട്ടിടം.രണ്ടാഴ്ചയായി പൊളിക്കല്‍ പ്രവൃത്തി നടക്കുന്നുണ്ടെങ്കിലും മരട്നഗരസഭയ്ക്ക് ഇതു സംബന്ധിച്ച് അറിവുണ്ടായിട്ടില്ലെന്ന് വാര്‍ഡ് കൗണ്‍സിലര്‍ മേഴ്സി പറഞ്ഞു.

മതിയായ സുരക്ഷ ഒരുക്കാതെ കെട്ടിടം പൊളിച്ചതിന് കരാറുകാരനെതിരെ കേസെടുക്കുമെന്ന് മരട് പോലീസ് അറിയിച്ചു.