പ്രകൃതി സൗന്ദര്യത്തിന് പേരുകേട്ട സ്ഥലങ്ങളില് ഒന്നാണ് 'ദൈവത്തിന്റെ സ്വന്തം നാട്'. അതുക്കൊണ്ട് തന്നെയാണ് ലോകമെമ്പാടുമുള്ള സഞ്ചാരികള് കേരളത്തിലേക്ക് ഒഴുകുന്നത്. വൈവിധ്യമാര്ന്ന ഭൂപ്രകൃതിയും സംസ്കാരവും ചരിത്രവും ഒക്കെക്കൊണ്ട് മലയാളനാട്ടിലെ ഓരോ പ്രദേശങ്ങളും അത്ഭുതപ്പെടുത്തുന്നവയാണ്. ഈ വ്യത്യസ്തയാണ്, ലോകത്തില് തീര്ച്ചയായും സന്ദര്ശനം നടത്തേണ്ട അമ്പത് പ്രദേശങ്ങളുടെ പട്ടികയില് കേരളത്തെ (Kerala Tourism) നാഷണല് ജിയോഗ്രാഫിക് ട്രാവലര് മാഗസിന് ഉള്പ്പെടുത്താന് കാരണം
പ്രകൃതിയോട് അലിഞ്ഞ് ചേരാന് ഇതിലും മനോഹരമായ മറ്റൊരുപ്രദേശമുണ്ടെന്ന് തോന്നുന്നില്ല. കാടും മലയും കടലും ഒക്കെക്കൊണ്ട് അനുഗ്രഹീതമായ നമ്മുടെ പ്രദേശം പലപ്പോഴും നമ്മള്ക്ക് തന്നെ അത്ഭുതങ്ങള് സമ്മാനിക്കാറുണ്ട്. വാരന്ത്യങ്ങളിലോ അല്ലെങ്കില് ഒന്നോ രണ്ടോ ദിവസങ്ങളിലോ ചുറ്റിക്കറങ്ങാന് പറ്റിയ കേരളത്തിലെ ഏറ്റവും മനോഹരവും അവിശ്വസനീയവുമായ ചില സ്ഥലങ്ങള് പങ്കുവയ്ക്കുന്നു
കുമരകം
കുട്ടനാട് മേഖലയുടെ ഭാഗമായി വേമ്പനാട് കായലിന്റെ കിഴക്കേ അറ്റത്ത് ചിതറിക്കിടക്കുന്ന ഒരു ദ്വീപസമൂഹമാണ് കുമരകം. അതിമനോഹരമായ ഈ പ്രദേശത്തെ ചെറിയ തുരുത്തുകള് അവിസ്മരണീയ അനുഭവങ്ങളാകും സമ്മാനിക്കുക. പ്രസിദ്ധമായ നെഹ്രു ട്രോഫി വള്ളംകളിക്ക് ആതിഥേയത്വം വഹിക്കുന്ന വേമ്പനാട് കായലിന്റെ ഏറ്റവും സുന്ദരമായ ഭാഗങ്ങള് ആസ്വദിക്കാന് കഴിയുന്നയിടമാണ് കുമരകം. രുചികരമായ കായല് വിഭവങ്ങളും സമുദ്രവിഭവങ്ങളും മറ്റ് തനത് ഭക്ഷണങ്ങളും ഒക്കെ ഇവിടെ അനുഭവിക്കാം. ഉന്മേഷകരമായ കടല്ത്തീരങ്ങളും പ്രകൃതിഭംഗി ആസ്വദിച്ചുള്ള അലസ നടത്തങ്ങള്, സൈക്കിളിംഗ് അല്ലെങ്കില് ബോട്ടിംഗ് എന്നിവയ്ക്കൊക്കെ ഇവിടെ അവസരമുണ്ട്.
ആലപ്പുഴ
ലോകത്തിലെ തന്നെ ഏറ്റവും മികച്ച ടൂറിസ്റ്റ് സ്പോട്ടുകളില് ഒന്നാണ് ആലപ്പുഴ. കൈത്തോടുകളും നദികളും വേമ്പനാട് കായലിനും അറബിക്കടലിനും ഇടയിലുള്ള ആലപ്പി, ഒരു ക്യാന്വാസിലെ ചിത്രമെന്നപ്പോലെ അഥിമനോഹരമാണ്. സര്റിയല് ദ്വീപുകള്, ഉഷ്ണമേഖലാ പച്ചപ്പ്, കാറ്റിലുയുന്ന തെങ്ങിന് തലപ്പുകള്, സുന്ദരമായ തുരുത്തുകളിലെ ഗ്രാമങ്ങള്, ചുറ്റിപിണഞ്ഞു കിടക്കുന്ന ജലപാതകള്, ശാന്തവും മനോഹരവുമായ കടല്ത്തീരങ്ങള്, ആഡംബര ഹൗസ് ബോട്ടുകള് എന്നിവയാല് ഇവിടം അതിശയപ്പെടുത്തും.
വയനാട്
പ്രകൃതിയോട് അലിഞ്ഞ് ചേരാന് ഇതിലും മികച്ചയൊരുയിടമുണ്ടോ എന്നത് സംശയമാണ്. പച്ചപ്പ് നിറഞ്ഞ ഈ സുന്ദരപ്രദേശം പശ്ചിമഘട്ട മലനിരകളുടെ ഭാഗമാണ്. നിഗൂഢമായ ഗുഹകള് പര്യവേക്ഷണം ചെയ്യാം, ആകാശം തൊട്ടുനില്ക്കുന്ന മലകളില് ട്രെക്കിംഗ് നടത്താം, വന്യജീവിജാലങ്ങള് അവരുടെ സ്വഭാവികതയോടെ സൈ്വര്യവിഹാരം നടത്തുന്നതിന് സാക്ഷിയാകാം, തടാകങ്ങളിലും നദികളിലും ബോട്ടിംഗ്ും കയാക്കിംഗുകളും ആസ്വദിക്കാം, ഗംഭീര വെള്ളച്ചാട്ടളും പുരാതന മനുഷ്യരുടെ കലകളും ഒക്കെ കണ്ടറിയാം ഇങ്ങനെ ഒരു സഞ്ചാരിക്ക് ചെയ്യാന് കഴിയുന്ന ഏറ്റവും ആവേശകരമായ കാര്യങ്ങളാണ് ഇവിടെയുള്ളത്.
കോഴിക്കോട്
മലബാറിന്റെ സംസ്കാരം അറിയാന് പറ്റിയോരുയിടമാണ് കോഴിക്കോട്. ഈ തീരദേശ നഗരം ചരിത്രപരമായ സ്ഥലങ്ങള്ക്കും സംസ്കാരത്തിനും പാചക അനുഭവങ്ങള്ക്കും പേരുകേട്ടതാണ്. മലബാര് ഭക്ഷണവും സൗഹൃദവും അവിസ്മരണിയമായിരിക്കും. ആധികാരികമായ മലബാര് ഭക്ഷണവും പലഹാരങ്ങളായ കല്ലുമ്മക്കായ, ചട്ടി പത്തിരി എന്നിവയും മറ്റും പരീക്ഷിച്ചു നോക്കണം. ഇവിടുത്തെ പഴയ വിളക്കുമാടവും, മനോഹരമായ സൂര്യാസ്തമയത്തിന് സാക്ഷ്യം വഹിക്കാന് കഴിയുന്ന കോഴിക്കോട് ബീച്ചും ഒരിക്കലും ഒഴിവാക്കരുത്.
