തദ്ദേശ സ്വയംഭരണ സ്ഥാപന തിരഞ്ഞെടുപ്പിനുള്ള പോളിംഗ് സാമഗ്രികളുടെ വിതരണം ബ്ലോക്ക്, മുനിസിപ്പല് വിതരണ കേന്ദ്രങ്ങളില് നാളെ(ഡിസംബര് 8, തിങ്കള്) നടക്കും. തിരക്ക് ഒഴിവാക്കുന്നതിനായി എല്ലാ കേന്ദ്രങ്ങളിലും പ്രത്യേകമായി കൗണ്ടറുകള് സജ്ജീകരിച്ചാണ് വിതരണം.
വോട്ടിംഗ് യന്ത്രം ഉള്പ്പെടെയുള്ള സാമഗ്രികള് വാങ്ങി, പരിശോധിച്ച് ഉറപ്പുവരുത്തിയശേഷം ഉദ്യോഗസ്ഥര് മുന്കൂട്ടി അറിയിച്ചിട്ടുള്ള വാഹനങ്ങള് കയറണം. പോളിംഗ് ഉദ്യോഗസ്ഥരെ ബൂത്തുകളില് എത്തിക്കുന്നതിനായി ജില്ലയില് ബസുകള് ഉള്പ്പെടെ 724 വാഹനങ്ങൾ സജ്ജമാക്കിയിട്ടുണ്ട്. ചൊവ്വാഴ്ച്ച രാവിലെ ഏഴു മുതല് വൈകുന്നേരം ആറു വരെയാണ് കോട്ടയം ജില്ലയില് വോട്ടെടുപ്പ്.
അറിഞ്ഞിരിക്കാം, വോട്ടു ചെയ്യാന്
1) വോട്ടര് പോളിംഗ് സ്റ്റേഷനില് പ്രവേശിക്കുമ്പോള് തിരിച്ചറിയല് വിവരങ്ങള് പോളിംഗ് ഓഫീസര് വോട്ടര്പട്ടിക പരിശോധിച്ച് ഉറപ്പാക്കും.
2) പരിശോധന പൂര്ത്തിയാക്കി വോട്ടര് അടുത്ത പോളിംഗ് ഓഫീസറെ സമീപിക്കുമ്പോൾ വിരലില് മഷി പുരട്ടും. തുടര്ന്ന് രജിസ്റ്ററില് ഒപ്പ്/വിരലടയാളം രേഖപ്പെടുത്തണം. ഇതു കഴിയുമ്പോള് വോട്ടര്ക്ക് സ്ലിപ്പ് നല്കും.
3) സ്ലിപ് വോട്ടിംഗ് യന്ത്രത്തിൻ്റെ ചുമതലയുള്ള പോളിംഗ് ഓഫീസർക്കു കൈമാറണം. ഓഫീസര് കണ്ട്രോള് യൂണിറ്റിലെ'ബാലറ്റ്' ബട്ടണ് അമര്ത്തി വോട്ട് ചെയ്യാൻ യന്ത്രം സജ്ജമാക്കും.
ബാലറ്റ് ബട്ടണ് അമര്ത്തുമ്പോള്, കണ്ട്രോള് യൂണിറ്റിലെ ചുവന്ന ബിസി ലൈറ്റും ബാലറ്റ് യൂണിറ്റിലെ പച്ച റെഡി ലൈറ്റും പ്രകാശിക്കും. വോട്ട് രേഖപ്പെടുത്താന് തയാറാണെന്ന് ഇത് സൂചിപ്പിക്കുന്നു.
4) ത്രിതല പഞ്ചായത്തിലേക്കുള്ള പോളിംഗിന്
വോട്ടിംഗ് കമ്പാര്ട്ട്മെന്റില് വോട്ട് രേഖപ്പെടുത്താനായി സജ്ജീകരിച്ച മൂന്നു ബാലറ്റ് യൂണിറ്റിലെയും പച്ച റെഡി ലൈറ്റ് പ്രകാശിച്ചു നില്ക്കും.
വോട്ടു രേഖപ്പെടുത്തല്
1) ത്രിതല പഞ്ചായത്തിൽ ഓരോ വോട്ടറും ഗ്രാമപഞ്ചായത്ത്, ബ്ലോക്ക് പഞ്ചായത്ത്, ജില്ലാ പഞ്ചായത്ത് എന്നിവയ്ക്ക് ഓരോ വോട്ട് വീതം, മൊത്തം മൂന്ന് വോട്ട് രേഖപ്പെടുത്തണം.
2) ബാലറ്റ് യൂണിറ്റുകള് ഗ്രാമപഞ്ചായത്ത്, ബ്ലോക്ക് പഞ്ചായത്ത്, ജില്ലാ പഞ്ചായത്ത് എന്ന ക്രമത്തിലാണ് സജ്ജീകരിച്ചിരിക്കുന്നത്.
3) ആദ്യത്തെ ബാലറ്റ് യൂണിറ്റില് ഗ്രാമപഞ്ചായത്ത് തലത്തില് മത്സരിക്കുന്ന സ്ഥാനാര്ഥികളുടെ പേരും ചിഹ്നങ്ങളുമുള്ള വെള്ള നിറത്തിലുള്ള ബാലറ്റ് ലേബല് ഉണ്ടാകും.
4) വോട്ടര് താന് വോട്ട് ചെയ്യാന് ആഗ്രഹിക്കുന്ന സ്ഥാനാര്ഥിയുടെ പേരിന് നേരെയുള്ള ബട്ടണ് അമര്ത്തണം.
5) ബട്ടണ് അമര്ത്തുമ്പോള് ഒരു ബീപ് ശബ്ദം കേള്ക്കുകയും സ്ഥാനാര്ഥിയുടെ ബട്ടണിന് നേരെയുള്ള ലൈറ്റ് തെളിയുകയും ചെയ്യും. ഇത് വോട്ട് ആ സ്ഥാനാര്ഥിക്ക് രേഖപ്പെടുത്തിയെന്ന് ഉറപ്പാക്കുന്നു.
6) മറ്റ് രണ്ട് തലങ്ങളിലേക്കുമുള്ള വോട്ടുകളും മുകളില് പറഞ്ഞ രീതിയില് തന്നെ രേഖപ്പെടുത്തണം. ബ്ലോക്ക് പഞ്ചായത്തിനുള്ള ബാലറ്റ് ലേബലുകള് പിങ്കി നിറത്തിലും ജില്ലാ പഞ്ചായത്തിനുള്ളത് നീലയുമാണ്.
7) മൂന്നു തലങ്ങളിലേക്കുമുള്ള വോട്ട് രേഖപ്പെടുത്തല് ശരിയായ രീതിയില് പൂര്ത്തിയാക്കുമ്പോള് ഒരു നീണ്ട ബീപ് ശബ്ദം കേള്ക്കാം.
8) ഒന്നോ രണ്ടോ തലങ്ങളിലേക്ക് വോട്ട് ചെയ്യാതെ ഒഴിവാക്കാന് വോട്ടര് ആഗ്രഹിക്കുന്നുവെങ്കില് അവസാനത്തെ ബാലറ്റ് യൂണിറ്റിലെ ചുവന്ന എന്ഡ് ബട്ടണ് (END BUTTON) അമര്ത്തി വോട്ടിംഗ് പ്രക്രിയ പൂര്ത്തിയാക്കണം. എന്ഡ് ബട്ടണ് അമര്ത്തുമ്പോള് പ്രക്രിയ പൂര്ത്തിയായതായി സൂചിപ്പിച്ചുകൊണ്ട് ഒരു നീണ്ട ബീപ് ശബ്ദം ഉണ്ടാകും.
9) ഒന്നോ രണ്ടോ തലങ്ങളിലെ വോട്ട് ഒഴിവാക്കി വോട്ടിംഗ് പ്രക്രിയ പൂര്ത്തിയാക്കുമ്പോള് മാത്രമേ എന്ഡ് ബട്ടണ് ഉപയോഗിക്കാന് പാടുള്ളൂ.
10) മൂന്ന് തട്ടുകളിലേക്കുമുള്ള വോട്ട് രേഖപ്പെടുത്തി കഴിഞ്ഞിട്ടുണ്ടെങ്കില് എന്ഡ് ബട്ടണ് അമര്ത്തേണ്ട ആവശ്യമില്ല.
11) വോട്ടര് എന്ഡ് ബട്ടണ് അമര്ത്തിക്കഴിഞ്ഞാല് ഒരു തട്ടിലേക്കും വോട്ട് രേഖപ്പെടുത്താന് കഴിയില്ല.
12) രണ്ട് ബട്ടണുകള് ഒരേ സമയം അമര്ത്തിയാല് ഒരു വോട്ടേ രേഖപ്പെടുത്തുകയുള്ളൂ. ഒരു ബട്ടണ് ഒന്നിലധികം തവണ അമര്ത്തിയാലും ഒരു വോട്ടേ രേഖപ്പെടുത്തുകയുള്ളൂ.
14) വോട്ടിംഗ് നടപടിക്രമങ്ങളുമായി ബന്ധപ്പെട്ട് ബുദ്ധിമുട്ടോ സംശയമോ ഉണ്ടെങ്കില് പോളിംഗ് ഉദ്യോഗസ്ഥരെ അറിയിക്കണം.
അവര് വോട്ടറെ സഹായിക്കാന് ബാധ്യസ്ഥരാണ്.
