E News

കോട്ടയം

ബൈക്ക് നിയന്ത്രണം വിട്ട് മതിലിൽ ഇടിച്ച് വിദ്യാർത്ഥി മരിച്ചു

enews 10 September,2025

ഉഴവൂർ: കുറിച്ചിത്താനം വെങ്ങിണിക്കാട്ട് ജ്യോതിയുടെ മകൻ ആദിത്യ ജ്യോതിയാണ് (17) അപകടത്തിൽ മരണമടഞ്ഞത്. ബുധനാഴ്ച രാത്രി ഒൻപതു മണിയോടെ ഉഴവൂർ – കുര്യനാട് റോഡിൽ പൂവത്തുങ്കലിനു സമീപം നിയന്ത്രണം വിട്ട് റോഡരികിലെ ഗയിറ്റിലും മതിലിലും ഇടിച്ച പൾസർ ബൈക്കിൽ നിന്നും തെറിച്ചു വീണായിരുന്നു അപകടം. നാട്ടുകാരുടെ സഹായത്താൽ മോനിപ്പള്ളിയിലെ സ്വകാര്യആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. കുറവിലങ്ങാട് പോലീസ് മേൽനടപടികൾ സ്വീകരിച്ചു. അമ്മ ദയ ജ്യോതി,സഹോദരൻ കൈലാസ് ജ്യോതി (ഒന്നാം ക്ലാസ് വിദ്യാർത്ഥി)

കോട്ടയം

ഇല്ലിക്കല്ലിൽ വിദഗ്ധ സംഘം പരിശോധന നടത്തി.

enews 10 September,2025

ഇല്ലിക്കൽ കല്ലിലെ കുടക്കല്ല് അപകടാവസ്ഥയിലാണെന്നും പരിശോധന വേണമെന്നുമുള്ള ആവശ്യത്തെ തുടർന്ന് ഇന്ന് വിദഗ്ധ സംഘം മേഖലയിലെത്തി പരിശോധന നടത്തി. ജില്ലാ കളക്ടർ ചേതൻകുമാർ മീണയുടെ നിർദേശപ്രകാരം പാലാ ആർഡിഒ, തഹസിൽദാർ, ജില്ലാ സോയിൽ കൺസർവേഷൻ ഓഫീസർ, ജില്ലാ ജിയോളജിസ്‌റ്റ്, എംജി യൂണിവേഴ്‌സി റ്റി വിദഗ്‌ധ സംഘം, വില്ലേജ് ഓഫീസർ, ടൂറിസം വകുപ്പ് അധികൃതർ, ദുരന്തനിവാരണ അതോറിറ്റി ഉദ്യോഗസ്ഥർ, പഞ്ചായ ത്ത് സെക്രട്ടറി, പ്രസിഡൻ്റ് എന്നിവരടങ്ങിയ സംഘമാണ് ഇല്ലിക്കൽ കല്ലിലെത്തിയത്. പ്രദേശവാസികൾ പരിഭ്രാന്തരാകേണ്ട ആവശ്യമില്ലെന്നും കാലപ്പഴക്കംമൂലം ഉണ്ടാകുന്ന വിള്ളലുകളാണെന്നും സംഘം അറിയിച്ചു. ഇത് സംബന്ധിച്ച പഠന റിപ്പോർട്ട് വരുംദിവസങ്ങളിൽ സമർപ്പിക്കും.നിലവിലെ വിള്ളലുകൾ വലിയ അപകട അവസ്ഥയല്ലെന്നും ഏതെങ്കിലും തരത്തിലുള്ള അപകടം വളരെ പെട്ടെന്ന് ഉണ്ടാകാനുള്ള സാധ്യതയില്ലെന്നും സംഘം വിലയിരുത്തി. പരിശോധനയ്ക്കെത്തിയ എല്ലാ വകുപ്പുകളും അവരുടെ റിപ്പോർട്ട് ഒരാഴ്ചയ്ക്കകം സമർപ്പിക്കും. സമീപത്തെ പാറമടയിലെ സ്ഫോടനം മൂലമുള്ള പ്രകമ്പനം അപകടാവസ്ഥ സൃഷ്ടിക്കുന്നു എന്ന ആക്ഷേപവും സംഘം ത ള്ളിക്കളഞ്ഞു. പാറമട ഏതാണ്ട് ഒരു കിലോമീറ്റർ മാറിയാണ് പ്രവർത്തിക്കുന്നത്.പാറഖനനം മൂലം വിള്ളൽ ഉണ്ടാകാനുള്ള സാധ്യത ഇല്ല എന്ന് ജിയോളജിസ്റ്റ് വ്യക്തമാക്കി. നേരത്തെ ഉള്ള വിള്ളലാണ് നിലവിലുള്ളത്. പാറ പൊട്ടിക്കുമ്പോൾ ഉണ്ടാകുന്ന പ്രകമ്പനം കൊണ്ട് അങ്ങനെ ഒരു സാധ്യത ഉണ്ടായിരുന്നെങ്കിൽ നേരത്തെ ഇത് അടർന്നു പോകേണ്ടതായിരുന്നു.ടൂറിസം തകർക്കാൻ ശ്രമം. പഞ്ചായത്ത് പ്രസിഡൻ്റ്.മൂന്നിലവ് പഞ്ചായത്തിലെ ഇല്ലിക്കൽ കല്ല് ടൂറിസം മേഖലയിൽ വലിയ കുതിപ്പുണ്ടാക്കിയതായി പഞ്ചായത്ത് പ്രസിഡന്റ് ചാർലി ഐസക്കും ഭരണസമിതി അംഗങ്ങളും പറഞ്ഞു. കോട്ടയം ജില്ലയുടെ പുറത്തുനിന്നും സംസ്ഥാനത്തിന്റെ വിവിധ ഭാഗങ്ങളിൽ നിന്നും ആളുകൾ മൂന്നിലവെന്ന കൊച്ചു ഗ്രാമത്തിലേക്ക് എത്തുന്നുണ്ട്. ആ ടൂറിസത്തെ നശിപ്പിക്കുന്നതിന് വേണ്ടി ആരെങ്കിലും മനപൂർവ്വം ഇല്ലിക്കൽ കല്ല് അപകടാവസ്ഥയിലാണെന്ന തരത്തിലുള്ള പ്രചരണം നടത്തുന്നതാണോ എന്ന് സംശയിക്കുന്നതായും ചാർലി ഐസക് പറഞ്ഞു.

കോട്ടയം

കടുപ്പാറ- വളതൂക്ക് പാലത്തിന്റെ നിർമ്മാണ ഉദ്ഘാടനം നടത്തി

E news 9 September,2025

പൂഞ്ഞാർ: കടുപ്പാറ- വളതൂക്ക് നിവാസികളുടെ ചിരകാല സ്വപ്‌നമായ വളതൂക്ക്- കടുപ്പാറ പാലത്തിന് എം.എൽ.എ ഫണ്ടിൽ നിന്നും അനുവദിച്ച 50 ലക്ഷം രൂപയുടെയും ജില്ലാ പഞ്ചായത്ത് അംഗം പി.ആർ അനുപമ അനുവദിച്ച 10 ലക്ഷം രൂപയുടെ അപ്രോച്ച് റോഡിന്റെ ഒന്നാം ഘട്ട നിർമ്മാണ പൂർത്തികരണത്തിന്റെയും ഉദ്ഘാടനം പൂഞ്ഞാർ എം.എൽ.എ അഡ്വ. സെബാസ്റ്റ്യൻ കുളത്തുങ്കൽ നിർവ്വഹിച്ചു. പൂഞ്ഞാർ ഗ്രാമ പഞ്ചായത്ത് പ്രസിഡന്റ് ഗീതാ നോബിൾ അധ്യക്ഷത വഹിച്ച സമ്മേളനത്തിൽ നിർമ്മാണ കമ്മിറ്റി കൺവീനറും സി.പി.ഐ.എം ജില്ലാ കമ്മറ്റിയംഗവുമായ ജോയി ജോർജ് സ്വാഗതം ആശംസിച്ചു. ബ്ലോക്ക് പഞ്ചായത്ത്‌ മെമ്പർമാരായ അഡ്വ.അക്ഷയ് ഹരി, അജിത് കുമാർ ബി, പൂഞ്ഞാർ ഗ്രാമപഞ്ചായത്ത് വൈസ് പ്രസിഡന്റ് തോമസ് ജോസ്, പൂഞ്ഞാർ തെക്കേക്കര ഗ്രാമപഞ്ചായത്ത് വികസന കാര്യ സ്റ്റാന്റിങ് കമ്മിറ്റി ചെയർമാൻ അനിൽകുമാർ മഞ്ഞപ്ലാക്കൽ, പൂഞ്ഞാർ തെക്കേക്കര ഗ്രാമപഞ്ചായത്ത് അംഗം നിഷ സാനു, ഗാന്ധിനർ റസിഡൻ്റീസ് അസോസിയേഷൻ പ്രസിഡൻ്റ് സമജ് പി.കെ പാപ്പാലിപറമ്പിൽ എന്നിവർ പ്രസംഗിച്ചു. പൂഞ്ഞാർ തെക്കേക്കര ഗ്രാമപഞ്ചായത്തിലെ കടുപ്പാറ പ്രദേശത്തെയും , പൂഞ്ഞാർ പഞ്ചായത്തിലെ വളതൂക്കിനെയും ബന്ധിപ്പിച്ച് ഈ പാലം യാഥാർത്ഥ്യമാകുന്നതോടെ പ്രദേശത്തെ ഗതാഗത സൗകര്യം ഏറെ വർദ്ധിക്കും. കടുപ്പാറ പ്രദേശവാസികൾക്ക് ഈരാറ്റുപേട്ട- മുണ്ടക്കയം സ്റ്റേറ്റ് ഹൈവേയിലേക്ക് വളരെ വേഗത്തിൽ പ്രവേശിക്കുന്നതിനു കഴിയും. കാലങ്ങളായി നാട്ടുകാർ ഉന്നയിച്ചിരുന്ന ഒരാവശ്യം സാക്ഷാത്കരിക്കപ്പെടുന്നതിലും, പ്രദേശത്തിന്റെ വികസനത്തിൽ വലിയ മുന്നേറ്റം കൈ വരുന്നതിലും ജനങ്ങൾ അങ്ങേയറ്റം ആഹ്ലാദത്തിലാണ്. പടക്കം പൊട്ടിച്ചും പായസം വിതരണം നടത്തിയുമാണ് പ്രദേശവാസികൾ സന്തോഷം പ്രകടിപ്പിച്ചത്.

കോട്ടയം

പാഴ്സൽ ലോറി മറിഞ്ഞ് അപകടം; ഡ്രൈവർക്കും ക്ലീനർക്കും പരിക്ക്

enews 9 September,2025

പാലാ: പാലാ തൊടുപുഴ റോഡിൽ നെല്ലാപ്പാറയ്ക്ക് സമീപം പാഴ്സൽ ലോറി മറിഞ്ഞ് അപകടം. പുലർച്ചെ 1:45 ഓടെയാണ് അപകടമുണ്ടായത്. എറണാകുളത്തുനിന്നും പാഴ്സലുമായി പാലായിലേക്ക് വരികയായിരുന്ന ലോറി നെല്ലാപ്പാറയിലെ കൊടും വളവിൽ താഴേക്ക് മറിയുകയായിരുന്നു. ക്യാബിനുള്ളിൽ കുടുങ്ങിയ ഡ്രൈവറെയും ക്ലീനറെയും ഫയർഫോഴ്സ് എത്തി വെട്ടിപ്പൊളിച്ചാണ് പുറത്തെടുത്തത്. പരിക്കേറ്റ ഇരുവരെയും ആശുപത്രിയിൽ പ്രവേശിപ്പിച്ചു. വാഹനം ഓടിച്ചിരുന്ന ആഷിക്ക്, സഹായി വിഷ്ണു എന്നവർക്കാണ് പരിക്കേറ്റത്. ഗുരുതര പരിക്കേറ്റ ആഷിക് ഐ.സി.യുവിലാണ്. തൊടുപുഴ ബേബി മെമ്മോറിയൽ ആശുപത്രിയിലാണ് ഇരുവരെയും പ്രവേശിപ്പിച്ചിരിക്കുന്നത്.

കോട്ടയം

കേരള കോൺഗ്രസ് നേതാവ് അഡ്വ.പ്രിൻസ് ലൂക്കോസ് അന്തരിച്ചു

Web 7 September,2025

കോട്ടയം : കേരള കോൺഗ്രസ് ജോസഫ് വിഭാഗം നേതാവ് പ്രിൻസ് ലൂക്കോസ് അന്തരിച്ചു. 53 വയസായിരുന്നു. വേളാങ്കണ്ണിയിൽ നിന്നും കോട്ടയത്തേയ്ക്കുള്ള യാത്രയ്ക്കിടെ ഹൃദയാഘാതത്തെ തുടർന്നാണ് അന്ത്യം. മൃതദേഹം ഇന്ന് രാവിലെ എട്ടരയോടെ കോട്ടയം തെള്ളകത്തെ കാര്യത്താസ് ആശുപത്രിയിൽ എത്തിച്ചു. കോട്ടയം ബാറിലെ അഭിഭാഷകനായിരുന്നു. കേരള കോൺഗ്രസ് നേതാവായിരുന്ന ഒ.വി ലൂക്കോസിന്റെ മകനാണ്.കേരള കോൺഗ്രസ് ജോസഫ് വിഭാഗം ഉന്നതാധികാരസമിതി അംഗമാണ്. കേരള വിദ്യാർത്ഥി കോൺഗ്രസ് എം സംസ്ഥാന പ്രസിഡന്റും, കേരള യൂത്ത് ഫ്രണ്ട് എം സംസ്ഥാന പ്രസിഡണ്ടായി പ്രവർത്തിച്ചിട്ടുണ്ട്.2021 ൽ മന്ത്രി വി.എൻ വാസവന് എതിരെ ഏറ്റുമാനൂർ നിയോജക മണ്ഡലത്തിൽ സ്ഥാനാർത്ഥിയായി മത്സരിച്ചു.

കോട്ടയം

തീക്കോയിൽ കർഷകചന്ത ആരംഭിച്ചു

Enews 31 August,2025

തീക്കോയി : തിരുവോണത്തോടനുബന്ധിച്ച് തീക്കോയി ഗ്രാമപഞ്ചായത്ത് കൃഷിഭവന്റെ ആഭിമുഖ്യത്തിൽ ഇക്കോ ഷോപ്പിൽ ഓണസമൃദ്ധി 2025 കർഷകചന്ത ആരംഭിച്ചു. കർഷകരുടെ വിഷരഹിത പച്ചക്കറികളും വാഴക്കുല, ചേന, കപ്പ , ചേമ്പ് തുടങ്ങി എല്ലാവിധ കർഷക ഉത്പന്നങ്ങളും ന്യായവിലയ്ക്ക് വിപണിയിൽ ലഭ്യമാണ്. വിപണി വിലയേക്കാൾ ഉയർന്ന നിരക്കിൽ കാർഷിക ഉത്പന്നങ്ങൾ സംഭരിക്കുകയും ചെയ്യുന്നു. ഗ്രാമപഞ്ചായത്ത് പ്രസിഡന്റ് കെ.സി ജെയിംസ് കർഷകചന്തയുടെ ഉദ്ഘാടനം നിർവഹിച്ചു. വൈസ് പ്രസിഡണ്ട് മാജി തോമസ്,ബിനോയി ജോസഫ്, കൃഷി ഓഫീസർ സുഭാഷ് എസ് എസ്, അബ്ദുൾ ഷഹീദ്,ജെസ്സി ജോർജ് ജോയി മുത്തനാട്ട്, മോഹനൻ തണ്ടാടിയിൽ തുടങ്ങിയവർ പങ്കെടുത്തു

കോട്ടയം

വേൾഡ് മലയാളി കൗൺസിൽ ഗ്ലോബൽ ഭാരവാഹികൾക്ക് സ്വീകരണം നൽകി.

Enews 31 August,2025

പാലാ : വേൾഡ് മലയാളി കൗൺസിൽ പാലാ ചാപ്റ്ററിൻ്റെ നേതൃത്വത്തിൽ ഗ്ലോബൽ ഭാരവാഹികൾക്ക് സ്വീകരണം നൽകി.സ്വീകരണ യോഗം നിഷാ ജോസ് കെ. മാണി ഉദ്ഘാടനം ചെയ്തു.പാലാ ചാപ്റ്റർ ചെയർമാൻ അഡ്വ.സന്തോഷ് മണർകാട് അധ്യക്ഷത വഹിച്ചു.ഗ്ലോബൽ ചെയർമാൻ ഐസക് ജോൺ പട്ടാണിപ്പറമ്പിൽ മുഖ്യ പ്രഭാഷണം നടത്തി.പ്രസിഡൻ്റ് ബേബി മാത്യു സോമതീരം അനുഗ്രഹ പ്രഭാഷണം നടത്തി. നഗരസഭാ ചെയർമാൻ തോമസ് പീറ്റർ ഗ്ലോബൽ ഭാരവാഹികളെ ആദരിച്ചു.ഗ്ലോബൽ വൈസ് പ്രസിഡൻ്റ് ഡൊമിനിക് ജോസഫ്,ഗ്ലോബൽ വിമൻസ് കൗൺസിൽ പ്രസിഡൻ്റ് എസ്തർ ഐസക് ജോൺ,ഇന്ത്യ റീജിയൺ പ്രസിഡൻ്റ് ശശിധരൻ,തിരുകൊച്ചി പ്രോവിൻസ് പ്രസിഡൻ്റ് വി. എം.അബ്ദുള്ള ഖാൻ,ചെയർമാൻ കെ. ആർ.രവീന്ദ്രൻ,ചാപ്റ്റർ സെക്രട്ടറി ബെന്നി മൈലാടൂർ,ഉണ്ണികുളപ്പുറം,അഡ്വ.എസ്.അഭിജിത്ത്,വിജി ആർ നായർ,ജോർജ് വലിയപറമ്പിൽ, മോനി വി ആദ്കുഴി, ഐഷാ ജഗദീഷ്, വി.എസ്.രാധാകൃഷ് ണൻ,ബഷീർ തേനമ്മാക്കൽ,സെബി പറമുണ്ട,ഹരി മേലേട്ട്, അനുരാഗ് പാണ്ടിക്കാട്,അഗസ്റ്റിൻ വാഴക്കാമല,മാർട്ടിൻ വയമ്പോത്തനാൽ,അലക്സ് പടിക്കമാലിൽ, അനിൽകുമാർ പാലക്കൽ എന്നിവർ പ്രസംഗിച്ചു.അത്തപൂക്കള മത്സരത്തിലെയും പുഞ്ചിരി മത്സരത്തിലെയും വിജയികൾക്ക് ക്യാഷ് പ്രൈസ് സമ്മാനമായി നൽകി.സാമ്പത്തികമായി പിന്നാക്കം നിൽക്കുന്ന ആദിവാസി കുട്ടികളുടെ പഠന സാമഗ്രികൾ വാങ്ങാൻ ഗ്ലോബൽ ഗുഡ്‌വിൽ അംബാസഡർ ജോണി കുരുവിള നൽകിയ സഹായ ധനം ബേബി മാത്യു സോമതീരം ബന്ധപ്പെട്ടവരെ ഏൽപ്പിച്ചു.

കോട്ടയം

ക്ഷീരപ്രഭയിൽ മേലുകാവ് ക്ഷീരസംഘം; മന്ത്രിയിൽനിന്ന് അവാർഡ് ഏറ്റുവാങ്ങി

Enews 30 August,2025

കോട്ടയം ജില്ലാ ക്ഷീരകർഷക സംഗമം 2025-26 നോടനുബന്ധിച്ച് മേലുകാവ് ക്ഷീരോത്പാദക സഹകരണ സംഘം ജില്ലയിലെ മികച്ച ആപ്കോസ് സംഘമായി തെരഞ്ഞെടുക്കപ്പെട്ടു. 1977 ൽ രജിസ്റ്റർ ചെയ്ത് പ്രവർത്തനം ആരംഭിച്ച മേലുകാവ് ക്ഷരോത്പാദക സഹകരണ സംഘം വളർച്ചയുടെ പടവുകൾ താണ്ടി മുന്നേറി കൊണ്ടിരിക്കുന്നു. ഈരാറ്റുപേട്ട ബ്ലോക്കിൽ ബി.എം.സി ഉള്ള ഏക ക്ഷീരസംഘം, പ്രതിദിനം ആയിരം ലിറ്ററിനുമേൽ പാൽ സംഭരണം, ഓഡിറ്റിൽ “എ“ ക്ലാസ് പദവി, ക്ഷീരകർക്ക് ആവശ്യമായ കാലിത്തീറ്റ,ധാതുലവണ മിശ്രിതം ലഭ്യമാക്കൽ, മിൽമ അനുബന്ധ പ്രവർത്തനങ്ങളിൽ മിൽമ ഷോപ്പീ ഉൾപ്പടെയുള്ള സംഘത്തിന്റെ പ്രവർത്തനങ്ങൾ ഏറെ ശ്രദ്ധേയമാണ്. കോവിഡ് മഹാമാരി ക്ഷീരമേഖലയെ പ്രതിസന്ധിയിലാക്കിയപ്പോൾ ക്ഷീരകർഷകർക്ക് വാതിൽപ്പടി സേവനം എത്തിച്ചുനൽകിയും, കർഷകർക്ക് കൈത്താങ്ങായും, ഇതര സംഘങ്ങൾക്ക് മാതൃകയായും ഉള്ള മേലുകാവ് സംഘത്തിന്റെ പ്രവർത്തനം ഏറെ ശ്ലാഘനീയമാണ്. സെക്രട്ടറിയെന്ന നിലയിലുള്ള ശ്രീ ബിജുമോൻറെ പ്രവർത്തനം കഴിഞ്ഞ വർഷം ജില്ലയിലെ ഏറ്റവും മികച്ച സെക്രട്ടറിക്കുള്ള അവാർഡിനർഹനാക്കി.പ്രസിഡൻറ് ശ്രീ ബേബി ജോസഫ് നെല്ലൻകുഴിയുടെ നേതൃത്വത്തിലുള്ള മികച്ച ഭരണ സമിതിയും, സെക്രട്ടറി ശ്രീ ബിജുമോൻ കുറ്റിയാത്തിൻറെ നേതൃത്വത്തിലുള്ള കഴിവുറ്റ ജീവനക്കാരും മേലുകാവ് സംഘത്തെ ജില്ലയിലെ മികച്ച ആപ്കോസ് ആക്കിമാറ്റി.

കോട്ടയം

Follow Us

Popular News