ന്യൂഡല്ഹി: സിബിഎസ്ഇ പത്താം ക്ലാസ് പരീക്ഷാ ഫലം പ്രസിദ്ധീകരിച്ചു. മെയ് 15ന് രണ്ടാം ഘട്ട പരീക്ഷ ആരംഭിക്കുന്നതിനാലാണ് ആദ്യ ഘട്ട പരീക്ഷാ ഫലം നേരത്തെ പ്രസിദ്ധീകരിച്ചത്. ഫെബ്രുവരി 17 മുതല് മാര്ച്ച് 11 വരെ നടന്ന ആദ്യ ഘട്ട പരീക്ഷയില് ഏകദേശം 25 ലക്ഷം വിദ്യാര്ത്ഥികളാണ് പരീക്ഷ എഴുതിയത്. പരീക്ഷാ ഫലം ഈ വെബ്സൈറ്റുകളില് അറിയാം http://results.cbse.nic.in http://cbse.gov.in http://cbseresults.nic.in http://digilocker.gov.in http://results.gov.in
മുണ്ടക്കയം : ചൊവ്വാഴ്ച വൈകുന്നേരം കനത്ത മഴയ്ക്കൊപ്പം ഉണ്ടായ ശക്തമായ കാറ്റിൽ മലയോരമേഖലയിൽ കനത്ത നാശനഷ്ടം.മുണ്ടക്കയം പഞ്ചായത്തിലെ മുരിക്കുംവയൽ, വണ്ടൻപതാൽ, പശ്ചിമ, കോരുത്തോട് പഞ്ചായത്തിലെ കോസടി, കൊട്ടാരക്കട എന്നീ സ്ഥലങ്ങളിൽ വൻമരങ്ങൾ കടപുഴകി വീണു. വണ്ടൻപതാൽ ഉള്ളാട്ടു കോളനിയിൽ സന്തോഷ് പുതുപ്പറമ്പിലിന്റ വീടിനു മുകളിലേക്ക് പന കടപുഴകി വീണു മുരിക്കുംവയൽ സ്കൂളിന് സമീപം സോഷ്യൽ ഫോറസ്റ്ററിയുടെ മരം വീണ് രണ്ടു വീടുകൾക്ക് സാരമായ കേടുപാടുകൾ സംഭവിച്ചു.പുന്നക്കൽ പി ആർ സുരേന്ദ്രൻ, പുന്നക്കൽ അമ്മിണി തമ്പി എന്നിവരുടെ വീടുകൾക് സാരമായ നാശ നഷ്ടം സംഭവിച്ചു. മരം വീടിന് മുകളിൽ വീണപ്പോൾ വീടിനുള്ളിൽ ആളുകൾ ഉണ്ടായിരുന്നെങ്കിലും ഇവർ പരിക്കേൽക്കാതെ രക്ഷപ്പെട്ടു. മരം വീണതിനെത്തുടർന്ന് ഇവരുടെ വീട്ടുപകരണങ്ങളും നശിച്ചു. വീടുകൾ വാസയോഗ്യമല്ലാതായി തീർന്നതോടെ ഇവരെ മുരിക്കുംവയൽ എൽ പി സ്കൂളിലേക്ക്താൽക്കാലികമായി മാറ്റി പാർപ്പിച്ചു. മുണ്ടക്കയം പഞ്ചായത്ത് പ്രസിഡണ്ട്, സെക്രട്ടറി, പൊതുപ്രവർത്തകർ എന്നിവരുടെ നേതൃത്വത്തിൽ സ്ഥലം സന്ദർശിച്ച് മേൽ നടപടികൾ സ്വീകരിച്ചു.ശക്തമായ കാറ്റിൽ പശ്ചിമ ക്ഷേത്രത്തിന് സമീപം റോഡിലേക്ക് വലിയ മരം കടപുഴകി വീണതോടെ അതുവഴിയുള്ള ഗതാഗതം നിലച്ചു. കോരുത്തോട് പഞ്ചായത്തിന്റെ കോസടി കൊട്ടാരക്കട ഭാഗങ്ങളിലും വ്യാപക നാശം ഉണ്ടായി.
തലപ്പലം: തലപ്പലം ഗ്രാമപഞ്ചായത്തിലെ മുഴുവൻ ആശാവർക്കർമാരേയും, ഹരിതകർമ്മഗംങ്ങളെയും, പാലിയേറ്റിവ് നഴ്സ് റീനായെയും ലയൺസ് ക്ലബ് ഓഫ് അടൂർ എമിറേറ്റ്സിൻ്റെ നേതൃത്വത്തിൽ ആദരിക്കുകയും ഭക്ഷ്യകിറ്റുകൾ വിതരണം ചെയ്യുകയും ചെയ്തു. നിയുക്ത എം എൽ എ യ്ക്കും ഗ്രാമപഞ്ചായത്ത് പ്രസിഡന്റിനും സ്വീകരണം നൽകി. പരിപാടിയുടെ ഉദ്ഘാടനം ഗ്രാമപഞ്ചായത്ത് പ്രസിഡന്റ് ശ്രീമതി. ജോമി ബെന്നിയുടെ അദ്ധ്യക്ഷതയിൽ നിയുക്ത പൂഞ്ഞാർ എം എൽ എ എം. ജെ.സെബാസ്റ്യൻ ( സജി ജോസഫ്) നിർവ്വഹിച്ചു. ലയൺസ് ജില്ലാ ചീഫ് പ്രോജക്ട് കോഡിനേറ്റർ സിബി മാത്യു പ്ലാത്തോട്ടം മുഖ്യപ്രഭാഷണം നടത്തി. പഞ്ചായത്ത് വൈസ് പ്രസിഡന്റ് ജോയി ജോസഫ് ആശംസകൾ അർപ്പിച്ചു. പഞ്ചായത്ത് ഭരണസമിതി അംഗങ്ങളും സ്റ്റാഫ് അംഗങ്ങളും യോഗത്തിൽ പങ്കെടുത്തു.
കോട്ടയം : തിരുനക്കര ബസ്റ്റാൻഡിൽ വീട്ടമ്മയുടെ ശരീരത്തിലൂടെ ബസ് കയറി ഇറങ്ങി. സംസ്ഥാന ഹാൻഡ്ലൂം കോപ്പറേറ്റീവ് സൊസൈറ്റിയിലെ പാർട്ട് ടൈം ജീവനക്കാരിയായ കോട്ടയം നട്ടാശ്ശേരി ഞള്ളക്കാട്ടു വീട്ടിൽ റോസ് സി.ഡി യാണ് അപകടത്തിൽപെട്ടത്. ഇന്ന് രാവിലെ 9.45 ഓടെയാണ് അപകടം. ഇറഞ്ഞാൽ – തിരുവഞ്ചൂർ റൂട്ടിലോടുന്ന ഈ സ്വകാര്യ ബസിലാണ് സ്ഥിരമായി റോസ് കോട്ടയത്ത് ജോലിസ്ഥലത്തേക്ക് എത്തുന്നതും. തിരുനക്കര സ്റ്റാൻഡിലെ ബസ് ബേയിൽ നിർത്തിയപ്പോൾ റോസ് ഇതിൽ നിന്നിറങ്ങി ബസിൻ്റെ ഇടതു വശം ചേർന്ന് മറികടക്കുമ്പോൾ ആൾ മുന്നിലുള്ളത് അറിയാതെ ഡ്രൈവർ, ബസ് മുന്നോട്ട് എടുത്തതാണ് അപകടത്തിനിടയാക്കിയത്. ഇടതു വശത്തെ ചക്രമാണ് റോസിൻ്റെ ശരീരത്തിലൂടെ കയറിയിറങ്ങിയത്. ഉടൻ തന്നെ യാത്രക്കാരും, പോലീസും ചേർന്ന് ഇവരെ പുറത്തെടുത്ത് കോട്ടയം മെഡിക്കൽ കോളജ് ആശുപത്രിയിലേക്ക് കൊണ്ടു പോയി. യുവതിയുടെ വയറിനും, മുഖത്തുമാണ് പരിക്കേറ്റിട്ടുണ്ട്. കോട്ടയം വെസ്റ്റ് പോലീസ് സ്ഥലത്തെത്തി തുടർ നടപടികൾ സ്വീകരിച്ചു.
കോട്ടയം: വിസ്ഡം ഇസ്ലാമിക് യൂത്ത് ഓർഗനൈസേഷന്റെ ആഭിമുഖ്യത്തിൽ സംഘടിപ്പിക്കുന്ന ഡയലോഗ് 12.0 ൻ്റെ പ്രചാരണത്തിൻ്റെ ഭാഗമായി സന്ദേശ പ്രയാണത്തിന് തുടക്കമായി. ഈരാറ്റുപേട്ടയിൽ നിന്നാരംഭിച്ച് ജില്ലയുടെ വിവിധ പ്രദേശങ്ങളിൽ പര്യടനം നടത്തി വ്യാഴാഴ്ച വൈകിട്ട് ഡയലോഗ് നഗരിയിൽ പ്രയാണം സമാപിക്കും. വ്യത്യസ്ത വിഷയങ്ങളിൽ വിവിധ ജില്ലകളിൽ നടന്ന ഡയലോഗുകൾക്ക് ശേഷമാണ് പന്ത്രണ്ടാമത് ഡയലോഗ് 14 ന് വൈകിട്ട് നാലിന് ഈരാറ്റുപേട്ട ബറക്കാത്ത് സ്ക്വയർ ഓഡിറ്റോറിയത്തിൽ സംഘടിപ്പിക്കുന്നത്. മരണത്തോടെ അവസാനിക്കുമെങ്കിൽ നാം എന്തിന് ഇവിടെ എന്ന പ്രമേയത്തിലാണ് ഡയലോഗ് 12.0 സംഘടിപ്പിക്കുന്നത്. സന്ദേശ പ്രയാസം വിസ്ഡം യൂത്ത് സംസ്ഥാന വൈസ് പ്രസിഡൻ്റ് ജംഷീർ സ്വലാഹി ഉദ്ഘാടനം ചെയ്തു. സംസ്ഥാന സെക്രട്ടറി അബ്ദുൽ ഖാലിക്, സ്റ്റേറ്റ് ഇവൻ്റ് കൺവീനർ ഹാഷിർ അക്ബർ, വിസ്ഡം ഇസ്ലാമിക് ഓർഗനൈസേഷൻ ജില്ലാ പ്രസിഡൻ്റ് നൗഷാദ് കെ എം , ജില്ലാ സെക്രട്ടറി ഷമീൽ എൻ എ, യൂത്ത് ഓർഗനൈസേഷൻ ജില്ലാ സെക്രട്ടറി സിയാദ് പി ഇ എന്നിവർ സംസാരിച്ചു.
കോട്ടയം : പടയോട്ടം എന്ന പേരിൽ മെയ് ഒന്നു മുതൽ ആരംഭിച്ച സോളിഡാരിറ്റി ജില്ലാ കമ്മിറ്റി നടത്തിവരുന്ന സ്പോർട്സ് മീറ്റ് ഏരിയ തലങ്ങളിൽ സമാപിച്ചു. ജില്ലാതല മത്സരങ്ങൾ നാളെ ഞായർ ഈരാറ്റുപേട്ടയിലെ വിവിധ ടർഫുകളിലായി നടക്കും. ഫ്രൈഡേ ക്ലബ് ഇൻഡോർ കോർട്ടിൽ 4 പിഎം മുതൽ 6PM വരെ നടക്കുന്ന ചടങ്ങിൽ സോളിഡാരിറ്റി സംസ്ഥാന ജനറൽ സെക്രട്ടറി ടി. ഇസ്മായിൽ ഉദ്ഘാടന കർമ്മം നിർവഹിക്കും.പൂഞ്ഞാർ നിയുക്ത എം.എൽ. എ. അഡ്വക്കേറ്റ് സെബാസ്റ്റ്യൻ എം.ജെ മുഖ്യ അതിഥിയാകും. ഈരാറ്റുപേട്ട മുനിസിപ്പാലിറ്റി ചെയർമാൻ അഡ്വക്കേറ്റ് വി.പി നാസർ ബാഡ്മിൻറൺ ടൂർണമെന്റ് ഉദ്ഘാടനം ചെയ്യും. നടക്കൽ സ്പോട്ടിഗോ ടർഫിൽ 7: pm മുതൽ 11:PM വരെ നടക്കുന്ന ക്രിക്കറ്റ് ടൂർണമെന്റ് സോളിഡാരിറ്റി സംസ്ഥാന സംഘടന സെക്രട്ടറി സാബിക് വെട്ടം ഉദ്ഘാടനം ചെയ്യും. ചാമ്പ്യൻഷിപ്പ്, റണ്ണർ അപ് ട്രോഫികൾ മറ്റു ജില്ലാതല മത്സരങ്ങളിലെ വിജയികൾക്കുള്ള ട്രോഫികൾ ആരോഗ്യകാര്യ സ്റ്റാൻഡിങ് കമ്മിറ്റി ചെയർപേഴ്സൺ റൈന നൗഫൽ,ജമാഅത്തെ ഇസ്ലാമി ജില്ല പ്രസിഡണ്ട് പി.എ മുഹമ്മദ് ഇബ്രാഹിം,വനിതാ വിഭാഗം ജില്ല പ്രസിഡണ്ട് സക്കീന അഷറഫ്, സോളിഡാരിറ്റി ജില്ല പ്രസിഡണ്ട് അർഷദ് പി. അഷറഫ്, എസ്.ഐ.ഒ ജില്ല പ്രസിഡണ്ട് അഷ്ഫാക്ക് ആലപ്ര, ജി.ഐ ഓ ജില്ല പ്രസിഡണ്ട് ലുബിന പി .എ എന്നിവർ ചേർന്ന് നൽകും. സോളിഡാരിറ്റി ജില്ല ജനറൽ സെക്രട്ടറി അഫ്സൽ സുലൈമാൻ, സ്പോർട്സ് കൺവീനറും യൂത്ത് കൾച്ചർ സെക്രട്ടറിയുമായ ഹാമിസ് മുണ്ടക്കയം,ജില്ലാ സെക്രട്ടറിമാരായ യാസിർ പുള്ളോലിൽ, അൻവർ ഹാറൂൺ,അഫ്കർ കാഞ്ഞിരപ്പള്ളി,സിയാദുൽ ഹഖ്,റമീസ് പി.എസ്,സമീർ കെ.എ, റാഫി കെ റഷീദ് തുടങ്ങിയവർ നേതൃത്വം നൽകും
ന്യൂഡല്ഹി: ആഗോളതലത്തില് ക്രൂഡ് ഓയില് വില കുതിച്ചുയരുന്ന സാഹചര്യത്തില് ഇന്ത്യയിലും എണ്ണ വില ഉടന് വര്ധിക്കുമെന്ന് റിപ്പോര്ട്ട്. രാജ്യത്തെ എണ്ണക്കമ്പനികള്ക്ക് പ്രതിമാസം ഏകദേശം 30,000 കോടി രൂപയുടെ സാമ്പത്തിക നഷ്ടം നേരിടുന്നതിനാല് മെയ് 15 ന് മുമ്പ് ഇന്ത്യയില് പെട്രോള്, ഡീസല് വില വര്ധിപ്പിക്കുമെന്ന് ഇന്ത്യാ ടുഡേ ടിവി റിപ്പോര്ട്ട് ചെയ്തു. വര്ധന കേന്ദ്രസര്ക്കാര് അംഗീകരിച്ചാല്, പെട്രോള്, ഡീസല് വില ലിറ്ററിന് ഏകദേശം 4-5 രൂപ വരെ ഉയരും. ഗാര്ഹിക എല്പിജി സിലിണ്ടറുകളുടെ വിലയില് 40-50 രൂപ വരെ വര്ധനവ് ഉണ്ടായേക്കാം. ഏകദേശം നാല് വര്ഷത്തിനിടെ ആദ്യമായാണ് പെട്രോള്, ഡീസല് വിലയില് വര്ധനവുണ്ടാകുന്നത്. 2022 മുതല് ചില്ലറ വില്പ്പന നിരക്കുകള് വലിയതോതില് മരവിപ്പിച്ചിരിക്കുകയാണ്. ഓരോ മാസവും ഏകദേശം 30,000 കോടി രൂപയുടെ നഷ്ടമാണ് ഒഎംസികള് നേരിടുന്നതെന്നും ചില്ലറ ഇന്ധന വിലയും വര്ദ്ധിച്ചുവരുന്ന ചെലവുകളും തമ്മിലുള്ള കടുത്ത പൊരുത്തക്കേട് ചൂണ്ടിക്കാണിച്ച് വൃത്തങ്ങള് പറഞ്ഞു. ഇറാനെതിരേ ഇസ്രായേല്-യുഎസ് ആക്രമണം തുടങ്ങിയതോടെ ക്രൂഡ് ഓയില് വില ബാരലിന് 70 യുഎസ് ഡോളറില് നിന്ന് 126 യുഎസ് ഡോളറായി ഉയര്ന്നതിനെത്തുടര്ന്നാണ് പ്രതിസന്ധി രൂക്ഷമായത്. ആഗോള എണ്ണമേഖലയില് കടുത്ത ആഘാതം നേരിട്ടിട്ടും, ഇന്ത്യ ഇതുവരെ ചില്ലറ ഇന്ധന വില വര്ധിപ്പിച്ചിട്ടില്ല. മിഡില് ഈസ്റ്റിലെ നീണ്ടുനില്ക്കുന്ന അസ്ഥിരത എന്നിവയെക്കുറിച്ചുള്ള ആശങ്കകള്ക്കിടയിലാണ് ആഗോള ക്രൂഡ് ഓയില് വില ബാരലിന് 70 യുഎസ് ഡോളറില് നിന്ന് 126 യുഎസ് ഡോളറായി ഉയര്ന്നത്. ലോകത്തിലെ എണ്ണ വിതരണത്തിന്റെ ഏകദേശം 20 ശതമാനം കടന്നുപോകുന്ന ഹോര്മുസ് കടലിടുക്ക്, യുദ്ധം മൂലം തടസ്സപ്പെട്ടിരിക്കുന്നത് ആഗോള ഊര്ജ്ജ വിതരണത്തിന് ആഘാതത്തിന് കാരണമായിരുന്നു.
ഈരാറ്റുപേട്ട :ഈരാറിനഴകായ് ഈരാറ്റുപേട്ട മാലിന്യ മുക്ത കാമ്പയിന്റെ ഭാഗമായി ശുചീകരണ പ്രക്രിയകൾ തുടരുന്ന മീനച്ചിലാറിന്റെ തീരത്ത് മുളയുടെ തൈകൾ നട്ടുപിടിപ്പിക്കുന്ന പ്രവൃത്തികൾക്ക് തുടക്കമായി. വെള്ളിയാഴ്ച രാവിലെ 7 മണിക്ക് പ്രമുഖ പരിസ്ഥിതി പ്രവർത്തകനും ഭൂമിക നേച്ചർ ക്ലബ്ബ് ചെയർമാനുമായ എബി ഇമ്മാനുവൽ നഗരസഭാ ചെയർപേഴ്സൻ അഡ്വ. വി.പി. നാസറിൽ നിന്നും മുള തൈ ഏറ്റുവാങ്ങി പദ്ധതിയുടെ ഉദ്ഘാടനം നിർവഹിച്ചു. തെക്കേകര കോസ്വേ ഭാഗം മുതൽ തടവനാൽ പാലം വരെയുള്ള ആറിൻ്റെ തീരത്താണ്തൈകൾ നട്ട് മനോഹരമാക്കുന്നത് . ഈ പ്രദേശങ്ങളിലുള്ള ബിൽഡിങ്ങുകളിൽ നിന്ന് വേസ്റ്റു കൾ വരുന്നതായി ശ്രദ്ധയിൽ പെട്ടതിനെ തുടർന്നാണ് നഗരസഭ ആരോഗ്യ വിഭാഗം ഇവിടംവൃത്തിയാക്കാൻ തീരുമാനിച്ചത്. തുടർന്നാണ് ചെടികളും ഇല്ലിയും നട്ടുപിടിപ്പിക്കാൻ തീരുമാനിച്ചത്.നഗരസഭാ കൗൺസിലർ സവാദ് ഇ.എ, കാമ്പയിൻ കോർഡിനേറ്റർ ഹസീബ് വെളിയത്ത്, നഗരസഭാ ക്ലീൻ സിറ്റി മാനേജർ ടി. രാജൻ, ടീം റസ്ക്യൂ ഫോഴ്സ് പ്രസിഡന്റ് നൗഷാദ് വെള്ളൂപറമ്പ്, ടീം എമർജൻസി പ്രസിഡൻ്റി അഷറഫ് കുട്ടി, സന്നദ്ധപ്രവർത്തകർ , നഗരസഭ ശുചീകരണ തൊഴിലാളികൾ എന്നിവർ പങ്കെടുത്തു. മുളയുടെ ആയിരത്തോളം തൈകളാണ് ഇവിടെ വെച്ചുപിടിപ്പിക്കുന്നത്.
