ഈരാറ്റുപേട്ട:നടയ്ക്കൽ അർബൻ ഹെൽത്ത് ആൻഡ് വെൽനെസ്സ് സെന്ററിൽ സൗജന്യ ജീവിത ശൈലി രോഗ നിർണയ ക്യാമ്പ് നടത്തി. നഗരസഭ അധ്യക്ഷ സുഹറ അബ്ദുൽഖാദർ ക്യാമ്പ് ഉദ്ഘാടനം ചെയ്തു .ആരോഗ്യ സ്റ്റാന്റിംഗ് കമ്മറ്റി ചേർപേഴ്സൺ ഷെഫ്ന അമീൻ. കൗൺസിലറന്മാരായ നാസർ വെള്ളുപറമ്പിൽ,എസ്.കെ നൗഫൽ,മുഹമ്മദ് ഇല്ലിയാസ്,ഡോക്ടർ അഞ്ജു ബി നായർ എന്നിവർ സംസാരിച്ചു. നൂറിലധികം പേർ ക്യാമ്പിൽ പങ്കെടുത്തു
ദില്ലി: നീറ്റ് യുജി പരീക്ഷാ ഫലം പ്രഖ്യാപിച്ചു. കേരളത്തിൽ നിന്ന് പരീക്ഷയെഴുതിയ 73328 പേർ അടക്കം 1236531 വിദ്യാർത്ഥികൾ ഉപരിപഠനത്തിന് യോഗ്യത നേടി. രാജസ്ഥാൻ സ്വദേശിയായ മഹേഷ് കുമാറാണ് ഒന്നാമതെത്തിയത്. ആദ്യ പത്ത് റാങ്കിൽ ഒരു പെൺകുട്ടി മാത്രമാണ് ഉള്ളത്. അതേസമയം കേരളത്തിൽ നിന്ന് ആരും ആദ്യ നൂറിൽ ഉൾപ്പെട്ടില്ല. മലയാളികളിൽ കോഴിക്കോട് നിന്ന് പരീക്ഷയെഴുതിയ ദീപ്നിയ ഡിബിയാണ് ഒന്നാമതെത്തിയത്. 109ാം റാങ്കാണ് അഖിലേന്ത്യാ തലത്തിൽ ദീപ്നിയ നേടിയത്. പാലാ ബ്രില്യൻ്റ് സ്റ്റഡി സെൻ്ററിലെ വിദ്യാർത്ഥിയായിരുന്നു ദീപ്നിയ. ആകെ 2209318 പേരാണ് ഇത്തവണ നീറ്റ് പരീക്ഷയെഴുതിയത്. മധ്യപ്രദേശിൽ നിന്നുള്ള ഉത്കർഷ് അവധിയ രണ്ടാം റാങ്ക് നേടി. മഹാരാഷ്ട്രയിൽ നിന്നുള്ള കൃഷ്ണ ജോഷിക്കാണ് മൂന്നാം റാങ്ക്. അഖിലേന്ത്യാ തലത്തിൽ അഞ്ചാം റാങ്ക് നേടിയ ദില്ലി സ്വദേശി അവിക അഗർവാളാണ് പെൺകുട്ടികളിൽ ഒന്നാമതെത്തിയത്. പെൺകുട്ടികളിൽ അഖിലേന്ത്യാ തലത്തിൽ 18ാം സ്ഥാനത്താണ് മലയാളിയായ ദീപ്നിയ ഡിബി. പരീക്ഷയെഴുതിയ മൂന്ന് ലക്ഷത്തിലേറെ വിദ്യാർത്ഥികൾക്ക് 140 നും 200നും ഇടയിൽ മാർക്ക് ലഭിച്ചു.
രാജ്യത്തെ വിവിധ വിഭാഗങ്ങളോടുള്ള സമീപനത്തിലും മതവിശ്വാസത്തിന്റെ പേരിലുള്ള വികലവും തീവ്രവുമായ ഇടപെടലുകളും , വിഘടനാത്മക വാദങ്ങളും രാജ്യസുരക്ഷയ്ക്കും മനുഷ്യന്റെ സ്വൈര്യ ജീവിതത്തിന് വിഘാദവും ദൂര വ്യാപക പ്രത്യാഘാതത്തിന് വഴിവയ്ക്കുന്നതുമാണെന്നും അതിനെതിരെ സമൂഹത്തെ ബോധവൽക്കരിക്കേണ്ടത് പണ്ഡിതന്മാരുടെ ബാധ്യതയാണെന്നും സമസ്ത കേരള ജംഇയ്യത്തുൽ ഉലമ കേന്ദ്ര മുശാവറ അംഗവും മർകസ് മുദരിസുമായ ചെറുശോല അബ്ദുൽ ജലീൽ സഖാഫി അഭിപ്രായപ്പെട്ടു. ഇസ്ലാമിനെ വികലമായി മനസ്സിലാക്കുകയും തദടിസ്ഥാനത്തിൽ ഇസ്ലാമിക ആദർശങ്ങളെ അവഹേളിക്കുകയും പരിഹസിക്കുകയും ചെയ്യുന്നവരെയാണ് ചാനൽ ചർച്ചകളിലും മറ്റും ഉപയോഗപ്പെടുത്തുന്നത് ഇത് അപലപനീയമാണ്. ഇസ്ലാമിനെ കുറിച്ചുള്ള തെറ്റായ ധാരണ സമൂഹത്തിൽ ഉണ്ടാക്കിത്തീർക്കാൻ മീഡിയകളും മറ്റ് സാങ്കേതിക വിദ്യകളും ദുരുപയോഗം ചെയ്യുന്നത് വർദ്ധിച്ചു വരികയാണ്. ഇതിനെതിരെ പൊതുബോധം ഉണരേണ്ടത് ആവശ്യമാണെന്നും അദ്ദേഹം ചൂണ്ടിക്കാട്ടി. സമസ്ത കേരള ജംഇയ്യത്തുൽ ഉലമയുടെ നൂറാം വാർഷികത്തിന്റെ പ്രചരണാർത്ഥം "100 പ്രകാശ വർഷങ്ങൾ" എന്ന പ്രമേയാടിസ്ഥാനത്തിൽ ജില്ലകൾ തോറും നടത്തപ്പെടുന്ന പണ്ഡിത ക്യാമ്പിന്റെ കോട്ടയം ജില്ലാ സംഗമത്തിൽ മുഖ്യപ്രഭാഷണം നടത്തുകയായിരുന്നു അദ്ദേഹം. തലയോലപ്പറമ്പ് ഖുറാ തങ്ങൾ നഗറിൽ സംഘടിപ്പിക്കപ്പെട്ട ക്യാമ്പിൽ കേരള മുസ്ലിം ജമാഅത്ത് ജില്ലാ പ്രസിഡണ്ട് കെ എസ് എം റഫീഖ് അഹമ്മദ് സഖാഫി അധ്യക്ഷത വഹിച്ചു. സമസ്ത ജില്ലാ പ്രസിഡണ്ട് അബ്ദുൽ അസീസ് സഖാഫി സമ്മേളനം ഉദ്ഘാടനം ചെയ്തു. ജില്ലാ ജനറൽ സെക്രട്ടറി പി എം അനസ് മദനി സ്വാഗതം ആശംസിച്ചു, സ്വാഗതസംഘം കൺവീനർ അബ്ദുല്ലത്തീഫ് മുസ്ലിയാർ ആപ്പാഞ്ചിറ,സുന്നി ജംഇയ്യത്തുൽ മുഅല്ലിമീൻ സതേൺ കേരള ചെയർമാൻ വിഎച്ച് അബ്ദുറഷീദ് മുസ്ലിയാർ, കേരള മുസ്ലിം ജമാഅത്ത് ഫിനാൻസ് സെക്രട്ടറി പി ടി നാസർ ഹാജി, എസ് വൈ എസ് ജില്ലാ സെക്രട്ടറി സിയാദ് അഹ്സനി, പി എസ് നൗഷാദ് ഹാജി, എസ് ജെ എം വൈക്കം റേഞ്ച് സെക്രട്ടറി സലീം മിസ്ബാഹി, കോട്ടയം റെയിഞ്ച് സെക്രട്ടറി അബ്ദുറഹ്മാൻ സഖാഫി, നദീർ ഷാ, യഅക്കൂബ് നഈമി, പിഎം ഇയാസ് സഖാഫി തുടങ്ങിയവർ സംസാരിച്ചു.രാജ്യസ്നേഹത്തിന്റെ പേരിൽ തെറ്റായ ധാരണ ഉണ്ടാക്കി രാജ്യദ്രോഹികളായി പലരെയും മുദ്രകുത്തുന്ന പ്രവണത വർദ്ധിച്ചുവരികയാണ്. ഇത്തരം ദുഷ്പ്രവണതകൾ രാജ്യത്തിന്റെ അഖണ്ഡതയ്ക്ക് വിഘാതം സൃഷ്ടിക്കുന്നതാണെന്നും അത്തരക്കാരെ കണ്ടെത്തി മാതൃകാപരമായ നടപടി കൈക്കൊള്ളണമെന്നും സർക്കാരിനോട് സമസ്ത ആവശ്യപ്പെട്ടു.
കോട്ടയം: വായനദിനവും വായന പക്ഷാചരണവും വിപുലവും വൈവിധ്യവുമാർന്ന പരിപാടികളോടെ ജില്ലയിൽ ആഘോഷിക്കാൻ ജില്ലാതല സംഘാടക സമിതി തീരുമാനിച്ചു. ജില്ലാ കളക്ടർ ജോൺ വി. സാമുവലിന്റെ അധ്യക്ഷതയിൽ നടന്ന വായനപക്ഷാചരണം ജില്ലാതല സംഘാടക സമിതി രൂപീകരണ യോഗത്തിലാണ് തീരുമാനം. സ്കൂൾ, കോളജ് വിദ്യാർഥികൾക്കും പൊതുജനങ്ങൾക്കുമായി വായനയുമായി ബന്ധപ്പെട്ട പരിപാടികളും മത്സരങ്ങളും സംഘടിപ്പിക്കും. ഡിജിറ്റൽ വായനയ്ക്കു ഊന്നൽ നൽകിയുള്ള പരിപാടികളും സംഘടിപ്പിക്കും. വായനദിനം- പക്ഷാചരണത്തിന്റെ ജില്ലാതല ഉദ്ഘാടനം ജൂൺ 19ന് രാവിലെ പത്തിന് മാന്നാനം സെന്റ് എംഫ്രേസ് സ്കൂളിൽ നടക്കുന്ന ചടങ്ങിൽ സഹകരണ-തുറമുഖം-ദേവസ്വം വകുപ്പുമന്ത്രി വി.എൻ. വാസവൻ ഉദ്ഘാടനം ചെയ്യും. സമാപനം ജൂലൈ ഏഴിന് അക്ഷരം മ്യൂസിയത്തിൽ നടക്കും. ജില്ലാ ലൈബ്രറി കൗൺസിലിന്റെ നേതൃത്വത്തിൽ വായനയെ പ്രോത്സാഹിപ്പിക്കാൻ ജില്ലയിലെ 376 ലൈബ്രറികളിലും രണ്ടാഴ്ച നീണ്ടു നിൽക്കുന്ന പരിപാടികൾ സംഘടിപ്പിക്കും. അക്ഷരം മ്യൂസിയത്തിന്റെ ആഭിമുഖ്യത്തിൽ വിദ്യാർഥികൾക്കായി വിവിധ മത്സരങ്ങളും സന്ദർശന പരിപാടികളും സംഘടിപ്പിക്കും. പി.എൻ. പണിക്കർ ഫൗണ്ടേഷന്റെ ആഭിമുഖ്യത്തിൽ ജൂൺ 18 വരെ വായന സദസുകൾ, വിദ്യാർഥികൾക്കായി ക്വിസ്, ചിത്രരചന മത്സരം, പദയാത്ര, ശാസ്ത്രകലാജാഥ, വിളംബരജാഥ, പുസ്തകപ്രദർശനം എന്നിവ സംഘടിപ്പിക്കും. പൊതുവിദ്യാഭ്യാസ വകുപ്പിന്റെ ആഭിമുഖ്യത്തിൽ ജൂൺ 19ന് എല്ലാ സ്കൂളുകളിലും വായനദിന പ്രതിജ്ഞയെടുക്കും. സാഹിത്യകാരന്മാരുമായുള്ള അഭിമുഖം, കഥ-കവിതാ രചന മത്സരങ്ങൾ എന്നിവയടക്കം രണ്ടാഴ്ച നീളുന്ന വിവിധ പരിപാടികൾ സ്കൂളുകളിൽ സംഘടിപ്പിക്കും. വിവര-പൊതുജന സമ്പർക്ക വകുപ്പിന്റെ നേതൃത്വത്തിൽ വിദ്യാർഥികൾക്കും പൊതുജനങ്ങൾക്കുമായി വിവിധ പരിപാടികളും മത്സരങ്ങളും സംഘടിപ്പിക്കും. സാക്ഷരതാ മിഷൻ തുല്യതാ പഠിതാക്കൾക്കായി വായന മത്സരം സംഘടിപ്പിക്കും. അഞ്ചിടങ്ങളിൽ വായനക്കൂട്ടായ്മ, പ്രേരക്മാർക്കായി ഉപന്യാസ മത്സരം, സെമിനാറുകൾ, പി.എൻ. പണിക്കർ അനുസ്മരണം എന്നിവ സംഘടിപ്പിക്കും. കോളജുകളിൽ ഭാഷാവകുപ്പുകളുടെ ആഭിമുഖ്യത്തിൽ രണ്ടാഴ്ചത്തെ പരിപാടികൾ സംഘടിപ്പിക്കും. കുടുംബശ്രീ സിഡിഎസ് തലത്തിൽ ലൈബ്രറികൾ സ്ഥാപിക്കുന്നതിന്റെ ഭാഗമായി പുസ്തകശേഖരണ പക്ഷാചരണം നടത്തും. 78 സി.ഡി.എസുകളിലും റൈറ്റേഴ്സ് ഫോറത്തിന്റെ ആഭിമുഖ്യത്തിൽ വായനദിന പരിപാടികളും എഴുത്തുകാരുടെ സംഗമങ്ങളും സംഘടിപ്പിക്കും. തദ്ദേശ സ്വയംഭരണവകുപ്പിന്റെ ആഭിമുഖ്യത്തിൽ ലൈബ്രറികളിൽ വിവിധ പരിപാടികൾ സംഘടിപ്പിക്കും. പക്ഷാചരണവുമായി ബന്ധപ്പെട്ടു സ്കൂളുകളിലും കോളജുകളിലും ലഹരിവിരുദ്ധ സന്ദേശം പ്രചരിപ്പിക്കും. ജില്ലാ ഭരണകൂടം, വിവര-പൊതുജനസമ്പർക്ക വകുപ്പ്, ലൈബ്രറി കൗൺസിൽ, പി.എൻ. പണിക്കർ ഫൗണ്ടേഷൻ, അക്ഷരമ്യൂസിയം, പൊതുവിദ്യാഭ്യാസം, ഉന്നത വിദ്യാഭ്യാസം, തദ്ദേശസ്വയംഭരണം വകുപ്പുകൾ, കുടുംബശ്രീ, സാക്ഷരതാമിഷൻ തുടങ്ങി വിവിധ വകുപ്പുകളുടെ ആഭിമുഖ്യത്തിലാണ് പരിപാടികൾ സംഘടിപ്പിക്കുന്നത്. ജില്ലാ പഞ്ചായത്ത് പ്രസിഡന്റ് ഹേമലത പ്രേംസാഗർ രക്ഷാധികാരിയും ജില്ലാ കളക്ടർ ചെയർമാനും ജില്ലാ ഇൻഫർമേഷൻ ഓഫീസർ കൺവീനറുമായി ജില്ലാതല സംഘാടക സമിതി രൂപീകരിച്ചു.ജില്ലാ ഇൻഫർമേഷൻ ഓഫീസർ എ. അരുൺ കുമാർ, പൊതുവിദ്യാഭ്യാസവകുപ്പ് ഡെപ്യൂട്ടി ഡയറക്ടർ ഹണി ജി. അലക്സാണ്ടർ, ലൈബ്രറി കൗൺസിൽ ജില്ലാ സെക്രട്ടറി എൻ. ചന്ദ്രബാബു, അക്ഷരമ്യൂസിയം സ്പെഷൽ ഓഫീസർ എസ്. സന്തോഷ്കുമാർ, സാക്ഷരതാ മിഷൻ ജില്ലാ കോ-ഓർഡിനേറ്റർ വി.വി. മാത്യു, പി.എൻ. പണിക്കർ ഫൗണ്ടേഷൻ ജില്ലാ ജനറൽ സെക്രട്ടറി പി.ജി.എം. നായർ, വൈസ് പ്രസിഡന്റ് ബി. രാജീവ്, അരവിന്ദാക്ഷൻ നായർ, ഐ-പി.ആർ.ഡി. അസിസ്റ്റന്റ് എഡിറ്റർ ഇ.വി. ഷിബു, ദിലീപ്, രാഹുൽ, നിഷോർ, വിവിധ വകുപ്പ് ഉദ്യോഗസ്ഥർ എന്നിവർ പങ്കെടുത്തു.
ഈരാറ്റുപേട്ട: എം.ഇ.എസ് യൂത്ത് വിങ് സംസ്ഥാന കമ്മറ്റിയുടെ ചുവട്-ലഹരി വിരുദ്ധ ബോധവത്ക്കരണ ക്യാമ്പയിൻ എം.ഇ.എസ് യൂത്ത് വിങ് കോട്ടയം ജില്ലാ കമ്മിറ്റിയുടെ നേതൃതത്തിൽ എരുമേലി എം ഇ എസ് കോളേജിലെ സോഷ്യൽ വർക്ക് വിഭാഗം വിദ്യാർത്ഥികൾ തെരുവുനാടകത്തിലൂടെ ഈരാറ്റുപേട്ട അഹമ്മദ് കുരിക്കൾ നിറൽ ബോധവത്ക്കരണ സന്ദേശം നൽകി, പ്രസ്തുത പരിപാടിയിൽ യൂത്ത് വിങ് ജില്ലാ പ്രസിഡന്റ് ഷെഹിം വിലങ്ങുപാറയുടെ അധ്യക്ഷത വഹിച്ച യോഗത്തിൽ യൂത്ത് വിങ്ങ് സംസ്ഥാന കമ്മിറ്റി അംഗം റയീസ് പടിപ്പുരക്കൽ ഉദ്ഘാടനം നിർവ്വഹിച്ചു യോഗത്തിൽ എം.ഈ.എസ് ജില്ലാ കമ്മറ്റി അംഗം ഹബീബുള്ള ഖാൻ ,അഡ്വ.സുഹൈൽ ഖാൻ എന്നിവർ ബോധവത്ക്കരണ സന്ദേശം നൽകി യൂത്ത് വിങ് ജില്ലാ കമ്മിറ്റി അംഗം അർഷാദ് നജീബ്, അൻവർഷ കെ.എം, ഷഫീക്ക് മണങ്ങലൂർ, അബു സലിം, സോഷ്യൽ വർക്ക് വിഭാഗം അദ്ധ്യാപിക സഹേബ എന്നിവർ സംസാരിച്ചു
ഈരാറ്റുപേട്ട .മുസ്ലിം ഗേൾസ് ഹയർ സെക്കൻഡറി സ്കൂളിൽ ദ്വിതീയ സോപാൻ എന്ന പേരിൽ ഉപജില്ലയിലെ മുഴുവൻ സ്കൂളുകളിലെയും ഗൈഡിങ് അംഗങ്ങളെ ഉൾപ്പെടുത്തിക്കൊണ്ട് ഏകദിന ക്യാമ്പ് നടത്തി. ഗൈഡിങ് യൂണിറ്റിലേക്ക് പുതുതായി പ്രവേശന ലഭിച്ച അംഗങ്ങൾക്കുള്ള മാർഗ്ഗനിർദ്ദേശങ്ങൾ നൽകുകയും ഏതാനും പ്രവർത്തന പരിശീലനങ്ങൾ നടത്തുകയും ചെയ്തു. മുസ്ലിം ഗേൾസ് ഹയർ സെക്കൻഡറി സ്കൂൾ ഹെഡ്മിസ്ട്രസ് എം പി ലീന ക്യാമ്പ് സന്ദർശിച്ച് ഗൈഡ് അംഗങ്ങളുമായി സംവദിച്ചു .സീനിയർ അധ്യാപകൻ മുഹമ്മദ് ലൈസൽ, പി ജി ജയൻ എന്നിവർ ആശംസകൾ അർപ്പിച്ചു .സ്കൗട്ട് ആൻഡ് ഗൈഡ് ഡിസ്ട്രിക്ട് ട്രെയിനിങ് കമ്മീഷണർ പി എൻ ഓമന, ജ്യോതി പി നായർ, ലിൻസി ജോയ്, ഖദീജ ജബ്ബാർ എന്നിവർ പരിപാടികൾക്ക് നേതൃത്വം നൽകി.
കാഞ്ഞിരപ്പള്ളി: കെ.കെ റോഡിൽ കാഞ്ഞിരപ്പള്ളി ടൗണിൽ വാഹനാപകടം. നിയന്ത്രണം നഷ്ടമായ കാർ ട്രാഫിക് സിഗ്നൽ പോസ്റ്റിൽ ഇടിച്ച് മറിഞ്ഞു. വെള്ളിയാഴ്ച പുലർച്ചെ നാലരയോടെ ആയിരുന്നു സംഭവം.കോട്ടയം ഭാഗത്തേക്ക് പോവുകയായിരുന്ന വാഹനമാണ് അപകടത്തിൽപ്പെട്ടത്. വാഹനത്തിൽ മൂന്നുപേർ ഉണ്ടായിരുന്നതായാണ് ലഭിക്കുന്ന വിവരം. നിസ്സാര പരിക്കേറ്റ ഇവരെ കാഞ്ഞിരപ്പള്ളി താലൂക് ആശുപത്രിയിൽ പ്രവേശിപ്പിച്ചു.അതേസമയം വാഹനത്തിൽ ഉണ്ടായിരുന്നവർ മദ്യപിച്ചിരുന്നതായി നാട്ടുകാർ ആരോപിക്കുന്നു. എന്നാൽ ഇത് പോലീസ് ഉദ്യോഗസ്ഥരോ, ആശുപത്രി വൃത്തങ്ങളോ സ്ഥിരീകരിച്ചിട്ടില്ല.
ഈരാറ്റുപേട്ട: ശൈഖ് മുഹമ്മദ് ഫരീദ് ബാവാഖാൻ മൌലവി ഖാദിരിയുടെ 35-ാമത് ഉറൂസ് ജൂൺ 14, 15 തീയതികളിൽ നടക്കുമെന്ന് സംഘാടകർ അറിയിച്ചു.ആത്മീയ വിജ്ഞാന സദസ്സ്, ഖതമുൽ ഖുർആൻ, ദിക്ർ മജ്ലിസ്, ത്വരീഖത്ത്, തസവ്വുഫ്, ശൈഖുന അനുസ്മരണ സമ്മേളനം തുടങ്ങിയ പരിപാടികളും നടക്കും.അബു ഫാസിൽ ഫരീദുദ്ദീൻ മൌലവി, മൌല സിദ്ദീഖ് മുഹമ്മദ് തിരുവനന്തപുരം എന്നിവർ രണ്ട് ദിവസങ്ങളിൽ മുഖ്യ പ്രഭാഷണം നടത്തും.ടി.എം. അബ്ദുൽ സലാം മൌലവി, അലി മൌലവി, മുഹമ്മദ് അഷ്റഫ് മൌലവി, മുഹമ്മദ് സുബൈർ മൌലവി, മുഹമ്മദ് ഇബ്രാഹിംകുട്ടി മൌലവി, മുഹമ്മദ് സൈനി ഉസ്താദ്, മുഹമ്മദ് സാലിം ഫൈസി എന്നിവരും സംബന്ധിക്കും.
