ഈരാറ്റുപേട്ടയിൽ നിന്നും കാണാതായ ആളുടെ മൃതദേഹം ഇല്ലിക്കൽകല്ലിൽ നിന്നും കണ്ടെത്തി.ഈരാറ്റുപേട്ട ഇളപ്പുങ്കൽ സ്വദേശിയായ മോഹനൻ എന്ന വ്യക്തിയെ 23 മുതൽ കാണ്മാനില്ലായിരുന്നു. തുടർന്ന് നടത്തിയ അന്വേഷണത്തിലാണ് ഇന്ന് ഇല്ലിക്കൽ കല്ലിന്റെ ഭാഗത്ത് നിന്നും മൃതദേഹം കണ്ടെത്തിയത്. ഈരാറ്റുപേട്ട പോലീസ് സ്ഥലത്തെത്തി മേൽ നടപടികൾ സ്വീകരിച്ചു. വിഷം ഉള്ളിൽ ചെന്നാണ് മരണം എന്ന് പ്രാഥമിക വിവരം
തീക്കോയി: ഈരാറ്റുപേട്ട വാഗമൺ റൂട്ടിൽ തീക്കോയിയിൽ റോഡരികിൽ വളവിൽ സ്ഥാപിച്ചിരിക്കുന്ന ട്രാൻസ്ഫോർമർ അപകട ഭീഷണി ഉയർത്തുന്നു. ദിനംപ്രതി നിരവധി വാഹനങ്ങൾ കടന്നുപോകുന്ന ഇവിടെ അപകടകരമായി സ്ഥിതി ചെയ്യുന്ന ട്രാൻസ്ഫോമർ മാറ്റി സ്ഥാപിക്കണമെന്ന ആവശ്യം ശക്തമാവുകയാണ്. തീക്കോയി ഗ്രാമപഞ്ചായത്ത് രണ്ടാം വാർഡിൽ സർവീസ് സഹകരണ ബാങ്കിന് എതിർവശമായാണ് ട്രാൻസ്ഫോർമർ സ്ഥിതി ചെയ്യുന്നത്. വലിയ വളവ് ആയതിനാൽ ഇരുവശങ്ങളിൽ നിന്നും എത്തുന്ന വാഹനങ്ങൾക്ക് ട്രാൻസ്ഫോർമർ മറ സൃഷ്ടിക്കുകയാണ്. റോഡിലേക്ക് ചേർന്ന് നിൽക്കുന്ന ട്രാൻസ്ഫോർമർ മൂലം നിരവധി അപകടങ്ങളും ഇവിടെ ഉണ്ടായിക്കഴിഞ്ഞു. നിരവധി തവണ ട്രാൻസ്ഫോർമർ മാറ്റണമെന്ന് ആവശ്യപ്പെട്ടെങ്കിലും അധികൃതരുടെ ഭാഗത്തുനിന്നും നടപടി ഉണ്ടായില്ല. പ്രധാന വിനോദസഞ്ചാര കേന്ദ്രമായ വാഗമണ്ണിലേക്ക് ദിനംപ്രതി ആയിരക്കണക്കിന് വാഹനങ്ങളാണ് ഇതുവഴി കടന്നുപോകുന്നത്. വഴി പരിചയം ഇല്ലാത്തവരാണ് കൂടുതലായും അപകടത്തിൽപ്പെടുന്നത്. റോഡിനോട് ചേർന്ന് വളവിൽ നിൽക്കുന്ന ഈ ട്രാൻസ്ഫോർമർ മാറ്റി സ്ഥാപിക്കുന്നതിനായി സമീപത്ത് സ്ഥലവും ഉണ്ട്. ബസ്റ്റോപ്പും സീബ്രാലൈനും ഈ ട്രാൻസ്ഫോർമറിന്റെ അടുത്ത് തന്നെയാണ് ഉള്ളത്. റോഡ് മുറിച്ചു കടക്കുമ്പോൾ കാൽനടയാത്രക്കാരെ ഈ ട്രാൻസ്ഫോർമർ മൂലം ഡ്രൈവർമാർക്ക് കാണാനും സാധിക്കില്ല. ഇതുമൂലം വലിയ അപകടത്തിനാണ് സാധ്യത ഉള്ളത്. കഴിഞ്ഞ ദിവസവും ഈ ഭാഗത്ത് നിയന്ത്രണം തെറ്റിയ കാർ സമീപത്തെ കെട്ടിടത്തിലേക്ക് ഇടിച്ചു കയറിയിരുന്നു. വളവിൽ റോഡിനോട് ചേർന്ന് നിൽക്കുന്നതിനാൽ ഈരാറ്റുപേട്ടയിൽ നിന്നും വാഗമൺ ഭാഗത്തേക്ക് പോകുന്ന വാഹനങ്ങൾ ട്രാൻസ്ഫോർമറിന്റെ സംരക്ഷണ ഭിത്തിയിൽ തട്ടുന്നതിനും കാരണമാവും. പ്രശ്നത്തിൽ അടിയന്തര നടപടി ഉണ്ടാവണമെന്ന് തീക്കോയി ഗ്രാമപഞ്ചായത്ത് പ്രസിഡന്റ് കെ.സി. ജെയിംസ്, തീക്കോയി സർവീസ് സഹകരണ ബാങ്ക് പ്രസിഡണ്ട് ടി.ഡി. ജോർജ്, വൈസ് പ്രസിഡന്റ് പയസ് കവള്ളംമാക്കൽ, കോൺഗ്രസ് മണ്ഡലം പ്രസിഡന്റ് ഹരി മണ്ണുമഠം, യു.ഡി.എഫ് ചെയർമാൻ ജോയി പൊട്ടനാനിയിൽ എന്നിവർ ആവശ്യപ്പെട്ടു.
കോട്ടയം.അധികാരങ്ങളിൽ അർഹമായ പ്രാതിനിധ്യം പിന്നാക്ക വിഭാഗങ്ങളുടെ അവകാശമാണെന്ന് തിരുവഞ്ചൂർ രാധാകൃഷ്ണൻ.എം.എൽ.എ.മുസ്ലിം എംപ്ലോയീസ് കൾച്ചറൽ അസോസിയേഷൻ (മെക്ക) 37-മത് ജന്മദിന സമ്മേളത്തിന്റെ പ്രചാരണാർഥം കോട്ടയത്ത് സംഘടിപ്പിച്ച ജില്ലാ കൺവെൻഷൻ ഉൽഘാടനം ചെയ്തു സംസാരിക്കുകയായിരുന്നു അദ്ദേഹം. സംസ്ഥാന പ്രസിഡന്റ് പ്രൊ.(ഡോ).പി.നസീർ മുഖ്യ പ്രഭാഷണം നടത്തി. ജില്ലാ പ്രസിഡന്റ് അസിം ഷാ റാവുത്തർ അധ്യക്ഷത വഹിച്ചു. മെക്കാ മീംസ് ഡയറക്ടർ പ്രൊ. എ എം.റഷീദ്,സംസ്ഥാന വൈസ് പ്രസിഡൻറ് കെ.എം. ജാഫർ, ജില്ലാ സെക്രട്ടറി ശുഐബ്, വൈസ് പ്രസിഡന്റ് പി.പി.എം. നൗഷാദ്,ട്രഷറർ എം.എഫ് അബ്ദുൽ ഖാദർ എന്നിവർ സംസാരിച്ചു.
മേലുകാവ് പഞ്ചായത്തിൽ വലിയമംഗലത്തും, മൂന്നിലവ് പഞ്ചായത്തിൽ കളത്തൂക്കടവ് പിഎച്ച്എസിയോട് ചേർന്നുള്ള സ്ഥലത്തും ഓപ്പൺ ജിം സ്ഥാപിക്കുന്നതിനും തലപ്പലം ഗ്രാമപഞ്ചായത്തിൽ വനിത വികസന കേന്ദ്രത്തിനോട് ചേർന്ന് ഫിറ്റ്നസ് സെന്ററിൽ കായിക ഉപകരണങ്ങൾ വാങ്ങുന്നതിനുമായി ജില്ലാ പഞ്ചായത്തിൽ നിന്നും 25 ലക്ഷം രൂപ അനുവദിച്ചതായി ജില്ലാ പഞ്ചായത്ത് മെമ്പർ അഡ്വ.ഷോൺ ജോർജ് അറിയിച്ചു. വലിയ മംഗലത്ത് റോഡിനോട് ചേർന്ന് പഞ്ചായത്തിന്റെ ഉടമസ്ഥതയിലുള്ള പുറമ്പോക്ക് ഭൂമി നവീകരിച്ച് ഓപ്പൺ ജിംനേഷ്യം നിർമ്മിക്കുന്നതിനുള്ള സ്ഥലം കണ്ടെത്തിയിരിക്കുന്നത്. പഞ്ചായത്ത് കമ്മിറ്റി തീരുമാനമെടുത്ത് താലൂക്കിൽ അറിയിച്ചിട്ടുണ്ട്. മേലുകാവ് പഞ്ചായത്തിൽ പിഎച്ച്എസിയോട് ചേർന്നു കിടക്കുന്ന പ്രദേശത്ത് വളരെ സൗകര്യപ്രദമായ രീതിയിൽ ഫിറ്റ്നസ് സെന്റർ നിർമിക്കാൻ കഴിയുമ്പോൾ കളത്തൂക്കടവ് മൂന്നിലവ് പ്രദേശത്തുള്ള ആളുകൾക്ക് ഇത് വലിയ രീതിയിൽ ഉപയോഗിക്കാൻ സാധിക്കും. ഈരാറ്റുപേട്ട തൊടുപുഴ മെയിൻ റോഡിനോട് ചേർന്നാണ് വലിയമംഗലത്ത് ഓപ്പൺ ജിമിനേഷൻ തുടങ്ങുന്നത്.കായിക വ്യായാമരംഗങ്ങളിൽ ആ പ്രദേശത്തെ ജനങ്ങൾക്ക് ഗുണകരമാകുന്ന പ്രദേശത്താണ് ഇത് സ്ഥാപിക്കുന്നത്. തലപ്പലം ഗ്രാമപഞ്ചായത്ത് മൂന്നാം വാർഡിൽ വനിതാ വികസന കേന്ദ്രത്തിനോട് ചേർന്നുള്ള സ്ഥലത്ത് ജിം ഉപകരണങ്ങൾ വാങ്ങുന്നതിനാണ് തുക അനുവദിച്ചിട്ടുള്ളതെന്നും ഷോൺ ജോർജ് പറഞ്ഞു
ഈരാറ്റുപേട്ട: കഴിഞ്ഞ ഒന്നര പതിറ്റാണ്ട് കാലമായി നാടിന്റെ ജീവകാരുണ്യ മേഖലയിൽ നിസ്വാർത്ഥ സേവനം ചെയ്തു വരുന്ന കരുണ പാലിയേറ്റീവ് കെയർ സൊസൈറ്റിയുടെ പുതിയ സംരംഭമായ ഫിസിയോതെറാപ്പി യൂണിറ്റിന്റെയും, നിർമ്മാണം പൂർത്തീകരിച്ച പുതിയ ബ്ലോക്കിന്റെയും ഉദ്ഘാടനം സെപ്റ്റംബർ 12 ന് ജമാഅത്തെ ഇസ്ലാമി കേരള അമീർ പി. മുജീബ് റഹ്മാൻ നിർവഹിക്കും. വൈകുന്നേരം 4 മണിക്ക് വെട്ടിപ്പറമ്പ് സെഞ്ച്വറി സ്റ്റാപ്പിൽസ് ഓഡിറ്റോറിയത്തിൽ നടക്കുന്ന സമ്മേളനത്തിൽ ആന്റോ ആന്റണി എം.പി, അഡ്വ. സെബാസ്റ്റ്യൻ കുളത്തുങ്കൽ എം.എൽ.എ, നഗരസഭാ ചെയർപേഴ്സൻ സുഹ്റ അബ്ദുൽഖാദർ, വിവിധ ഗ്രാമപഞ്ചായത്ത് പ്രസിഡന്റുമാർ, മറ്റ് ജനപ്രതിനിധികൾ, മത സാമൂഹിക നേതാക്കൾ തുടങ്ങി നിരവധി പേർ പങ്കെടുക്കും. ഉദ്ഘാടന സമ്മേളനത്തിന് പുറമേ പാലിയേറ്റീവ് കുടുംബ സംഗമവും, കലാ വിരുന്നും ഉണ്ടായിരിക്കും. പരിപാടിയുടെ വിജയത്തിനായി വിപുലമായ സ്വാഗതസംഘം രൂപീകരിച്ചു. അബ്ദുൽ ഖാദർ (അജ്മി), സാലി നടുവിലേടത്ത്, മജീദ് വട്ടക്കയം, എ.എം.എ. ഖാദർ, എം.എഫ് അബ്ദുൽ ഖാദർ എന്നിവർ രക്ഷാധികാരികളായിരിക്കും. ചെയർമാൻ: ഹാഷിർ നദ്വി, ജനറൽ കൺവീനർ: അവിനാഷ് മൂസ, ട്രഷറർ: സി.എച്ച്. നാസർ, വൈസ് ചെയർമാൻമാർ: ടി.എം.കെ. ഷെരീഫ് (നിഷ യൂണിഫോം), പി.പി.എം. നൗഷാദ്, ജോയിന്റ് കൺവീനർമാർ: അജ്മൽ പാറനാനി, സഹൽ സലീം എന്നിവർ മറ്റു ഭാരവാഹികളാണ്.
അഡ്വ. സെബാസ്റ്റ്യൻ കുളത്തുങ്കൽ എം.എൽ.എ. നേതൃത്വം നൽകുന്ന എംഎൽഎ സർവീസ് ആർമി പൂഞ്ഞാറിന്റെ നേതൃത്വത്തിൽ, കെ.എം. മാണിയുടെ ഓർമ്മക്കായി, നിർധന കിടപ്പുരോഗികൾക്കുള്ള ചികിത്സാ ധനസഹായ പദ്ധതിയായ കാരുണ്യ സ്പർശം പൂഞ്ഞാറിന്റെ ഭാഗമായി പൂഞ്ഞാർ നിയോജകമണ്ഡലത്തിലെ 10 തദ്ദേശസ്ഥാപന പ്രദേശങ്ങളിൽ നിന്നായി തെരഞ്ഞെടുക്കപ്പെട്ടിട്ടുള്ള 100 കിടപ്പ് രോഗികൾക്ക് പൂഞ്ഞാർ എം എൽ എ അഡ്വ. സെബാസ്റ്റ്യൻ കുളത്തുങ്കൽ, അവരവരുടെ വീടുകളിൽ നേരിട്ടെത്തി ഓണക്കിറ്റ് നൽകുന്നു. കിറ്റ് വിതരണം 25.08.2025 , 2.PM ന് കോരുത്തോട് ഗ്രാമപഞ്ചായത്തിലെ വനമേഖലയ്ക്കുള്ളിലുള്ള പട്ടികവർഗ്ഗ ഗ്രാമമായ കൊമ്പുകുത്തിയിലെ ഗുണഭോക്താവിന് നൽകിക്കൊണ്ട് സ്വാതന്ത്ര്യസമര സേനാനിയായ ശ്രീ. രവീന്ദ്രൻ വൈദ്യർ നിർവഹിക്കും കിറ്റ് വിതരണ സമയ വിവര പട്ടിക : 25-08-2025 : 02.00 PM മുതൽ കോരുത്തോട് 26-08-2025 :10.00 AM മുതൽ പൂഞ്ഞാർ 12.30 PM മുതൽ പൂഞ്ഞാർ തെക്കേക്കര 04.00 PM മുതൽ കൂട്ടിക്കൽ 28-08-25 : 02.00 PM മുതൽ മുണ്ടക്കയം 29-08-25 : 01.00 PM മുതൽ തീക്കോയി 30-08-25 :02.30 PM മുതൽ ഈരാറ്റുപേട്ട 01-09-25 :09.30 AM മുതൽ പാറത്തോട് 02.30 PM മുതൽ തിടനാട് 04-09-25 : 02.30 pm മുതൽ എരുമേലി
ഈരാറ്റുപേട്ട: ദിനംപ്രതി നൂറ് കണക്കിന് വിനോദ സഞ്ചാരികൾ എത്തി ചേരുന്ന മൂന്നിലവ് പഞ്ചായത്തിലെ വിനോദസഞ്ചാര കേന്ദ്രമായ ഇല്ലിക്കൽ കല്ലിലെ കൂറ്റൻ പാറയിൽ വലിയ വിള്ളൽ കണ്ടെത്തിയെന്ന വാർത്ത ഭീതിജനകമാണ്. ഇതിന്റെ നിജസ്ഥിതി കണ്ടെത്തുന്നതിനായി അടിയന്തിരമായി മൈനിങ്ങ് ആന്റ് ജിയോളജി വിഭാഗവും ദുരന്തനിവാരണ വിഭാഗവും പഠനം നടത്തണം. സംഭവത്തിന്റെ പ്രാധ്യന്യം കണക്കിലെടുന്ത് അടിയന്തര സുരക്ഷ ഉറപ്പാക്കണമെന്ന് ആവശ്യപ്പെട്ട് കോട്ടയം ജില്ലാ കലക്ടർക്ക് പി.ഡി.പി പൂഞ്ഞാർ മണ്ഡലം കമ്മറ്റി നിവേദനം നൽകി.
തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിനു മുന്നോടിയായി ഇലക്ട്രോണിക് വോട്ടിങ് യന്ത്രങ്ങളുടെ സൂക്ഷ്മപരിശോധനയുടെ ഭാഗമായി മോക്പോൾ നടത്തി. തദ്ദേശ തെരഞ്ഞെടുപ്പിനുള്ള വോട്ടിങ് യന്ത്രങ്ങൾ സൂക്ഷിച്ചിട്ടുള്ള ഏറ്റുമാനൂർ സത്രം കോമ്പൗണ്ടിൽ മൂന്നു ദിവസങ്ങളിലായാണ് പരിശോധന.3430 കൺട്രോളിങ് യൂണിറ്റുകളും ഓരോന്നിനും മൂന്നുവീതം ബാലറ്റിങ് യൂണിറ്റുകളും (ഗ്രാമപഞ്ചായത്ത്, ബ്ലോക്ക് പഞ്ചായത്ത്, ജില്ലാ പഞ്ചായത്തുകളിലേക്ക് വോട്ടു രേഖപ്പെടുത്തുന്നതിന്) ആണ് ആകെയുള്ളത്. ഇതിൽ 343 യന്ത്രങ്ങളിലാണ് മോക് പോൾ നടത്തുന്നത്.ഒൻപത് യന്ത്രങ്ങളിൽ 2000 വോട്ടുവീതവും ബാക്കിയുള്ളവയിൽ 60 വോട്ടുകൾ വീതവും ചെയ്ത് യന്ത്രങ്ങൾ കൃത്യമായി പ്രവർത്തിക്കുന്നുവെന്ന് ഉറപ്പാക്കുകയാണ് ചെയ്യുന്നത്. രാഷ്ട്രീയപാർട്ടി പ്രതിനിധികളുടെകൂടി സാന്നിധ്യത്തിലാണ് പരിശോധന. വെള്ളി, ശനി ദിവസങ്ങളിലും തുടരും.വെള്ളിയാഴ്ച രാവിലെ 11ന് ജില്ലാ തെരഞ്ഞെടുപ്പ് ഓഫീസറായ ജില്ലാ കളക്ടർ ചേതൻകുമാർ മീണ യന്ത്രങ്ങളുടെ സൂക്ഷ്മപരിശോധന വിലയിരുത്തി. ഇലക്ഷൻ ഡെപ്യൂട്ടി കളക്ടർ ഷീബ മാത്യു, ചാർജ് ഓഫീസർ നിജു കുര്യൻ എന്നിവർ നേതൃത്വം നൽകി.
