E News

Latest News

പടയോട്ടം സോളിഡാരിറ്റി ജില്ല സ്പോഴ്‌സ് മീറ്റ് നാളെ

enews 9 May,2026

കോട്ടയം : പടയോട്ടം എന്ന പേരിൽ മെയ് ഒന്നു മുതൽ ആരംഭിച്ച സോളിഡാരിറ്റി ജില്ലാ കമ്മിറ്റി നടത്തിവരുന്ന സ്പോർട്സ് മീറ്റ് ഏരിയ തലങ്ങളിൽ സമാപിച്ചു. ജില്ലാതല മത്സരങ്ങൾ നാളെ ഞായർ ഈരാറ്റുപേട്ടയിലെ വിവിധ ടർഫുകളിലായി നടക്കും. ഫ്രൈഡേ ക്ലബ് ഇൻഡോർ കോർട്ടിൽ 4 പിഎം മുതൽ 6PM വരെ നടക്കുന്ന ചടങ്ങിൽ സോളിഡാരിറ്റി സംസ്ഥാന ജനറൽ സെക്രട്ടറി ടി. ഇസ്മായിൽ ഉദ്ഘാടന കർമ്മം നിർവഹിക്കും.പൂഞ്ഞാർ നിയുക്ത എം.എൽ. എ. അഡ്വക്കേറ്റ് സെബാസ്റ്റ്യൻ എം.ജെ മുഖ്യ അതിഥിയാകും. ഈരാറ്റുപേട്ട മുനിസിപ്പാലിറ്റി ചെയർമാൻ അഡ്വക്കേറ്റ് വി.പി നാസർ ബാഡ്മിൻറൺ ടൂർണമെന്റ് ഉദ്ഘാടനം ചെയ്യും. നടക്കൽ സ്പോട്ടിഗോ ടർഫിൽ 7: pm മുതൽ 11:PM വരെ നടക്കുന്ന ക്രിക്കറ്റ് ടൂർണമെന്റ് സോളിഡാരിറ്റി സംസ്ഥാന സംഘടന സെക്രട്ടറി സാബിക് വെട്ടം ഉദ്ഘാടനം ചെയ്യും. ചാമ്പ്യൻഷിപ്പ്, റണ്ണർ അപ് ട്രോഫികൾ മറ്റു ജില്ലാതല മത്സരങ്ങളിലെ വിജയികൾക്കുള്ള ട്രോഫികൾ ആരോഗ്യകാര്യ സ്റ്റാൻഡിങ് കമ്മിറ്റി ചെയർപേഴ്സൺ റൈന നൗഫൽ,ജമാഅത്തെ ഇസ്ലാമി ജില്ല പ്രസിഡണ്ട് പി.എ മുഹമ്മദ് ഇബ്രാഹിം,വനിതാ വിഭാഗം ജില്ല പ്രസിഡണ്ട് സക്കീന അഷറഫ്, സോളിഡാരിറ്റി ജില്ല പ്രസിഡണ്ട് അർഷദ് പി. അഷറഫ്, എസ്.ഐ.ഒ ജില്ല പ്രസിഡണ്ട് അഷ്‌ഫാക്ക് ആലപ്ര, ജി.ഐ ഓ ജില്ല പ്രസിഡണ്ട് ലുബിന പി .എ എന്നിവർ ചേർന്ന് നൽകും. സോളിഡാരിറ്റി ജില്ല ജനറൽ സെക്രട്ടറി അഫ്സൽ സുലൈമാൻ, സ്പോർട്സ് കൺവീനറും യൂത്ത് കൾച്ചർ സെക്രട്ടറിയുമായ ഹാമിസ് മുണ്ടക്കയം,ജില്ലാ സെക്രട്ടറിമാരായ യാസിർ പുള്ളോലിൽ, അൻവർ ഹാറൂൺ,അഫ്കർ കാഞ്ഞിരപ്പള്ളി,സിയാദുൽ ഹഖ്,റമീസ് പി.എസ്,സമീർ കെ.എ, റാഫി കെ റഷീദ് തുടങ്ങിയവർ നേതൃത്വം നൽകും

കേരളം

മെയ് 15ന് ശേഷം പെട്രോള്‍, ഡീസല്‍ വില കൂടുമെന്ന് റിപ്പോര്‍ട്ട്; ഗ്യാസിനും വര്‍ധിക്കും

enews 9 May,2026

ന്യൂഡല്‍ഹി: ആഗോളതലത്തില്‍ ക്രൂഡ് ഓയില്‍ വില കുതിച്ചുയരുന്ന സാഹചര്യത്തില്‍ ഇന്ത്യയിലും എണ്ണ വില ഉടന്‍ വര്‍ധിക്കുമെന്ന് റിപ്പോര്‍ട്ട്. രാജ്യത്തെ എണ്ണക്കമ്പനികള്‍ക്ക് പ്രതിമാസം ഏകദേശം 30,000 കോടി രൂപയുടെ സാമ്പത്തിക നഷ്ടം നേരിടുന്നതിനാല്‍ മെയ് 15 ന് മുമ്പ് ഇന്ത്യയില്‍ പെട്രോള്‍, ഡീസല്‍ വില വര്‍ധിപ്പിക്കുമെന്ന് ഇന്ത്യാ ടുഡേ ടിവി റിപ്പോര്‍ട്ട് ചെയ്തു. വര്‍ധന കേന്ദ്രസര്‍ക്കാര്‍ അംഗീകരിച്ചാല്‍, പെട്രോള്‍, ഡീസല്‍ വില ലിറ്ററിന് ഏകദേശം 4-5 രൂപ വരെ ഉയരും. ഗാര്‍ഹിക എല്‍പിജി സിലിണ്ടറുകളുടെ വിലയില്‍ 40-50 രൂപ വരെ വര്‍ധനവ് ഉണ്ടായേക്കാം. ഏകദേശം നാല് വര്‍ഷത്തിനിടെ ആദ്യമായാണ് പെട്രോള്‍, ഡീസല്‍ വിലയില്‍ വര്‍ധനവുണ്ടാകുന്നത്. 2022 മുതല്‍ ചില്ലറ വില്‍പ്പന നിരക്കുകള്‍ വലിയതോതില്‍ മരവിപ്പിച്ചിരിക്കുകയാണ്. ഓരോ മാസവും ഏകദേശം 30,000 കോടി രൂപയുടെ നഷ്ടമാണ് ഒഎംസികള്‍ നേരിടുന്നതെന്നും ചില്ലറ ഇന്ധന വിലയും വര്‍ദ്ധിച്ചുവരുന്ന ചെലവുകളും തമ്മിലുള്ള കടുത്ത പൊരുത്തക്കേട് ചൂണ്ടിക്കാണിച്ച് വൃത്തങ്ങള്‍ പറഞ്ഞു. ഇറാനെതിരേ ഇസ്രായേല്‍-യുഎസ് ആക്രമണം തുടങ്ങിയതോടെ ക്രൂഡ് ഓയില്‍ വില ബാരലിന് 70 യുഎസ് ഡോളറില്‍ നിന്ന് 126 യുഎസ് ഡോളറായി ഉയര്‍ന്നതിനെത്തുടര്‍ന്നാണ് പ്രതിസന്ധി രൂക്ഷമായത്. ആഗോള എണ്ണമേഖലയില്‍ കടുത്ത ആഘാതം നേരിട്ടിട്ടും, ഇന്ത്യ ഇതുവരെ ചില്ലറ ഇന്ധന വില വര്‍ധിപ്പിച്ചിട്ടില്ല. മിഡില്‍ ഈസ്റ്റിലെ നീണ്ടുനില്‍ക്കുന്ന അസ്ഥിരത എന്നിവയെക്കുറിച്ചുള്ള ആശങ്കകള്‍ക്കിടയിലാണ് ആഗോള ക്രൂഡ് ഓയില്‍ വില ബാരലിന് 70 യുഎസ് ഡോളറില്‍ നിന്ന് 126 യുഎസ് ഡോളറായി ഉയര്‍ന്നത്. ലോകത്തിലെ എണ്ണ വിതരണത്തിന്റെ ഏകദേശം 20 ശതമാനം കടന്നുപോകുന്ന ഹോര്‍മുസ് കടലിടുക്ക്, യുദ്ധം മൂലം തടസ്സപ്പെട്ടിരിക്കുന്നത് ആഗോള ഊര്‍ജ്ജ വിതരണത്തിന് ആഘാതത്തിന് കാരണമായിരുന്നു.

പ്രാദേശികം

മീനച്ചിലാർ ശുചീകരണം; തീരത്ത് മുള തൈകൾ നട്ടു

enews 9 May,2026

ഈരാറ്റുപേട്ട :ഈരാറിനഴകായ് ഈരാറ്റുപേട്ട മാലിന്യ മുക്ത കാമ്പയിന്റെ ഭാഗമായി ശുചീകരണ പ്രക്രിയകൾ തുടരുന്ന മീനച്ചിലാറിന്റെ തീരത്ത് മുളയുടെ തൈകൾ നട്ടുപിടിപ്പിക്കുന്ന പ്രവൃത്തികൾക്ക് തുടക്കമായി. വെള്ളിയാഴ്ച രാവിലെ 7 മണിക്ക് പ്രമുഖ പരിസ്ഥിതി പ്രവർത്തകനും ഭൂമിക നേച്ചർ ക്ലബ്ബ് ചെയർമാനുമായ എബി ഇമ്മാനുവൽ നഗരസഭാ ചെയർപേഴ്സൻ അഡ്വ. വി.പി. നാസറിൽ നിന്നും മുള തൈ ഏറ്റുവാങ്ങി പദ്ധതിയുടെ ഉദ്ഘാടനം നിർവഹിച്ചു. തെക്കേകര കോസ്‍വേ ഭാഗം മുതൽ തടവനാൽ പാലം വരെയുള്ള ആറിൻ്റെ തീരത്താണ്തൈകൾ നട്ട് മനോഹരമാക്കുന്നത് . ഈ പ്രദേശങ്ങളിലുള്ള ബിൽഡിങ്ങുകളിൽ നിന്ന് വേസ്റ്റു കൾ വരുന്നതായി ശ്രദ്ധയിൽ പെട്ടതിനെ തുടർന്നാണ് നഗരസഭ ആരോഗ്യ വിഭാഗം ഇവിടംവൃത്തിയാക്കാൻ തീരുമാനിച്ചത്. തുടർന്നാണ് ചെടികളും ഇല്ലിയും നട്ടുപിടിപ്പിക്കാൻ തീരുമാനിച്ചത്.നഗരസഭാ കൗൺസിലർ സവാദ് ഇ.എ, കാമ്പയിൻ കോർഡിനേറ്റർ ഹസീബ് വെളിയത്ത്, നഗരസഭാ ക്ലീൻ സിറ്റി മാനേജർ ടി. രാജൻ, ടീം റസ്ക്യൂ ഫോഴ്സ് പ്രസിഡന്റ് നൗഷാദ് വെള്ളൂപറമ്പ്, ടീം എമർജൻസി പ്രസിഡൻ്റി അഷറഫ് കുട്ടി, സന്നദ്ധപ്രവർത്തകർ , നഗരസഭ ശുചീകരണ തൊഴിലാളികൾ എന്നിവർ പങ്കെടുത്തു. മുളയുടെ ആയിരത്തോളം തൈകളാണ് ഇവിടെ വെച്ചുപിടിപ്പിക്കുന്നത്.

കേരളം

വനിതകള്‍ക്ക് സൗജന്യ ബസ് യാത്ര, നീക്കം തുടങ്ങി കെഎസ്ആര്‍ടിസി

enews 9 May,2026

സംസ്ഥാനത്ത് വനിതകള്‍ക്ക് സൗജന്യ ബസ് യാത്രയൊരുക്കുന്ന 'ഇന്ദിര ഗ്യാരണ്ടി' പദ്ധതിയില്‍ നീക്കം തുടങ്ങി കെഎസ്ആര്‍ടിസി. പ്രതിദിന വനിതാ യാത്രക്കാരുടെ കണക്കെടുപ്പ് നടത്താന്‍ കെഎസ്ആര്‍ടിസിക്ക് നിര്‍ദേശം നല്‍കി. കോര്‍പ്പറേഷന്‍ എംഡിയുടെ പ്രത്യേക നിര്‍ദ്ദേശപ്രകാരം നാളെ മുതല്‍ കെഎസ്ആര്‍ടിസി ബസുകളില്‍ 'ജെന്‍ഡര്‍ ടിക്കറ്റിംഗ്' സംവിധാനം പ്രാബല്യത്തില്‍ വരും. പ്രതിദിനം കെഎസ്ആര്‍ടിസിയെ ആശ്രയിക്കുന്ന 29 ലക്ഷം യാത്രക്കാരില്‍ 19 ലക്ഷത്തോളം വരുന്ന വനിതകളുടെ വിവരങ്ങളാണ് പുതിയ സംവിധാനത്തിലൂടെ ശേഖരിക്കുക. ടിക്കറ്റ് നല്‍കുമ്പോള്‍ യാത്രക്കാരന്‍ പുരുഷനാണോ സ്ത്രീയാണോ എന്ന് ഇടിഎം മെഷീനില്‍ രേഖപ്പെടുത്താന്‍ കണ്ടക്ടര്‍മാര്‍ക്ക് കര്‍ശന നിര്‍ദ്ദേശം നല്‍കിയിട്ടുണ്ട്. സാങ്കേതിക മാറ്റങ്ങള്‍ പരിചയപ്പെടുത്താന്‍ കണ്ടക്ടര്‍മാര്‍ക്ക് ഐടി വിഭാഗം അടിയന്തര പരിശീലനം നല്‍കും. ഓരോ ഡിപ്പോയിലെയും യൂണിറ്റ് ഓഫീസര്‍മാര്‍ ഇതിന് മേല്‍നോട്ടം വഹിക്കും. യുഡിഎഫ് സര്‍ക്കാരിന്റെ പ്രഖ്യാപിത ലക്ഷ്യം നടപ്പിലാക്കുന്നതിലൂടെ കോര്‍പ്പറേഷനുണ്ടാകുന്ന സാമ്പത്തിക ബാധ്യത കണക്കാക്കാനാണ് ഈ വിവരശേഖരണം ലക്ഷ്യമിടുന്നത്.

കോട്ടയം

മുസ്ലിം ഗേൾസ് സ്കൂളിൽ വിദ്യാർത്ഥികൾക്കായി 12.5 ലക്ഷം രൂപയുടെ ക്ഷേമ പ്രവർത്തനങ്ങൾ നടത്തും

enews 7 May,2026

ഈരാറ്റുപേട്ട.ഈ വർഷം ഈരാറ്റുപേട്ട മുസ്ലിം ഗേൾസ് സ്കൂളിൽ വിദ്യാർത്ഥികൾക്കായി 12.5 ലക്ഷം രൂപയുടെ ക്ഷേമ പ്രവർത്തനങ്ങൾ നടത്തുവാൻ സ്കൂൾ നടത്തിപ്പുകാരായ മുസ്ലിം എഡ്യൂക്കേഷണൽ ട്രസ്റ്റ് തീരുമാനിച്ചു.ചെയർമാൻ പ്രൊഫ.എം.കെ.ഫരീദ് അധ്യക്ഷത വഹിച്ചു. അഡ്മിഷൻ നേടുന്ന വിദ്യാർത്ഥികൾക്ക് ബാഗും കുടയും സൗജന്യമായി നൽകും .ഉന്നത വിജയം നേടുന്ന എല്ലാ ക്ലാസിലെയും വിദ്യാർത്ഥികൾക്ക് 500 രൂപ വീതം മാസം തോറും സ്കോളർഷിപ്പും അതു കൂടാതെ ആവശ്യപ്പെടുന്ന കുട്ടികൾക്കെല്ലാം പ്രഭാത ഭക്ഷണം നൽകുന്നതിനായിരിക്കും 12.5 ലക്ഷം രൂപ വിനിയോഗിക്കുക. ഈ വർഷം സ്കൂൾ ഫിറ്റ്നസുമായി ബന്ധപ്പെട്ട് സർക്കാർ ഇറക്കിയ നടപടിക്രമങ്ങൾ ലഘുകരിക്കണമെന്ന് ട്രസ്റ്റ് യോഗം ആവശ്യപ്പെട്ടു.സ്കൂൾ അദ്ധ്യായന നിലവാരം മെച്ചപ്പെടുത്തുന്നതിനായി മാനേജർ എം.കെ.അൻസാരി തയ്യാറാക്കിയ അവതരിപ്പിച്ച റിപ്പോർട്ട് യോഗം അംഗീകരിച്ചു.സെക്രട്ടറി പി.കെ. കൊച്ചുമുഹമ്മദ് സ്വാഗതവും ട്രഷറർ എം.എസ്.കൊച്ചുമുഹമ്മദ് നന്ദിയും പറഞ്ഞു.

കോട്ടയം

തണ്ണീർപന്തലൊരുക്കി കുടുംബശ്രീ സിഡിഎസ്

enews 7 May,2026

മൂന്നിലവ്: പഞ്ചായത്ത് കുടുംബശ്രീ സിഡിഎസിന്‍റെ ആഭിമുഖ്യത്തിൽ തണ്ണീർപന്തലൊരുക്കി. പഞ്ചായത്ത് പ്രസിഡന്‍റ് കെ.വി. സെലീനാമ്മ ഉദ്ഘാടനം ചെയ്തു. ചെയർപേഴ്സൺ ബീന റോയി അധ്യക്ഷത വഹിച്ചു. പഞ്ചായത്ത് സെക്രട്ടറി ഷീജാമോൾ, മെംബർ നിഷ, വൈസ് ചെയർപേഴ്സൺ റീന റെനോൾഡ്, ഇത്തമ്മ മാത്യു, ചാർളി ഐസക്, ലിൻസിമോൾ എന്നിവർ പങ്കെടുത്തു. മൂന്നിലവ് ടൗണിൽ ഈസ്റ്റ് ബാങ്കിന് സമീപമാണ് തണ്ണീർപ്പന്തൽ പ്രവർത്തിക്കുന്നത്.

കോട്ടയം

രണ്ട് എം.എൽ.എമാർ; പാലായ്ക്ക് ഇരട്ടി മധുരം

enews 7 May,2026

ഈരാറ്റുപേട്ട: നിയമസഭാംഗങ്ങൾ സത്യപ്രതിജ്ഞ ചെയ്യുമ്പോൾ പാലായ്ക്ക് ഇരട്ടിമധുരം. മണ്ഡലത്തിന് രണ്ട് എം.എൽ.എമാരെ കിട്ടിയ സന്തോഷത്തിലാണ് പാലാക്കാർ. ഒന്ന് സ്വന്തം എം.എൽ.എ മാണി സി. കാപ്പനാണെങ്കിൽ രണ്ടാമൻ പൂഞ്ഞാർ എം.എൽ.എ അഡ്വ. എം.ജെ. സെബാസ്റ്റ്യനാണ്. പാലാ നിയോജകമണ്ഡല പരിധിയിലെ തലപ്പലം പഞ്ചായത്തിലെ പ്ലാശനാലിലാണ് എം.ജെ. സെബാസ്റ്റ്യൻ താമസിക്കുന്നത്. പൂഞ്ഞാർ മണ്ഡലത്തിലെ പ്രധാന പട്ടണമായ ഈരാറ്റുപേട്ട നഗരസഭയും തലപ്പലം പഞ്ചായത്തും അതിർത്തി പങ്കിടുന്ന തദ്ദേശ സ്ഥാപനങ്ങളാണ്. ഒരേ മുന്നണിയിലെ എം.എൽ.എമാരാണ് രണ്ടു നിയോജകമണ്ഡലത്തിലും എന്നതിനാൽ പരസ്പരം ധാരണയോടെ അനേകം വികസന പ്രവർത്തനങ്ങൾ നടത്താൻ കഴിയുമെന്നാണ് പ്രതീക്ഷ. കഴിഞ്ഞ ടേമിൽ തുടക്കമിട്ട ഇളപ്പുങ്കൽ പാലം ഉൾപ്പടെ വൻ പദ്ധതികൾ വേഗത്തിലാക്കാൻ കഴിയും.

ജനറൽ

ഉത്കണ്ഠ കുറയ്ക്കാം 10 മിനിറ്റ് ദൈനംദിന ശീലങ്ങളിലൂടെ

enews 7 May,2026

ദിവസവും 10 മിനിറ്റ് മാറ്റിവച്ചാല്‍ മതി ശാരീരികവും മാനസികവുമായ ആരോഗ്യം വേഗത്തില്‍ മെച്ചപ്പെടുത്താം. മാനസികവും ശാരീരികവുമായ ആരോഗ്യം വീണ്ടെടുക്കാന്‍ ജീവിതത്തില്‍ വലിയ വലിയ മാറ്റങ്ങള്‍ വരുത്തണം, എന്നും ജിമ്മില്‍ പോകണം, പോഷകസമൃദ്ധമായ ഭക്ഷണം കഴിക്കണം, യോഗ ചെയ്യണം, അങ്ങനെ പല കാര്യങ്ങളായിരിക്കും മനസിലേക്ക് വരുന്നത്. പലര്‍ക്കും ഇതൊക്കെ ചെയ്യണമെന്ന് ആഗ്രഹവും ഉണ്ടാകും. എന്നാല്‍ സമയം കിട്ടുന്നില്ല എന്നതാണ് പ്രശ്‌നം അല്ലേ?. എന്നാല്‍ ഇതൊന്നും വേണ്ട. വെറും 10 മിനിറ്റ് സമയം മാറ്റിവച്ചാല്‍ മതി നിങ്ങളുടെ ആരോഗ്യം വേഗത്തില്‍ മെച്ചപ്പെടുത്താന്‍ കഴിയുന്ന ചില കാര്യങ്ങള്‍ ചെയ്യാന്‍ കഴിയും.

Latest News

Follow Us

Popular News