ഈരാറ്റുപേട്ട: പൂഞ്ഞാർ മണ്ഡലം എൽ.ഡി.എഫ് സ്ഥാനാർഥി അഡ്വ. സെബാസ്റ്റ്യൻ കുളത്തുങ്കലിന്റെ പ്രചാരണത്തിന് ആവേശം പകരാൻ ഇന്ന് എൽ.ഡി.വൈ.എഫ് റോഡ് ഷോ. ഡി.ജെ ഷോയുടെ അകമ്പടിയോടെ വൈകുന്നേരം മൂന്നിന് പിണ്ണാക്കനാട്ടുനിന്ന് റോഡ് ഷോ ആരംഭിക്കും. തിടനാട്, ഈരാറ്റുപേട്ട, നടക്കൽ, തീക്കോയി, എം.ഇ.എസ് ജംഗ്ഷൻ, പൂഞ്ഞാർ തെക്കേക്കര, പൂഞ്ഞാർ, പുളിക്കപ്പാലം, പെരുന്നിലം, അരുവിത്തുറ, കടുവാമുഴി തുടങ്ങിയ സ്ഥലങ്ങളിലൂടെ കടന്ന് ഈരാറ്റുപേട്ട മുട്ടം ജംഗ്ഷനിൽ സമാപിക്കും.
പൂഞ്ഞാർ: പൂഞ്ഞാർ പിടിക്കാനുറച്ച് ‘മാസ് സ്ക്വാഡു’മായി യുഡിഎഫ്. മണ്ഡലത്തിലെ വോട്ടർമാരെ ഒരേ സമയം നേരിൽകാണാനുള്ള വിപുലമായ പദ്ധതിയുമായാണ് യു.ഡി.എഫ് രംഗത്തെത്തിയത്. യുഡിഎഫ് സ്ഥാനാർത്ഥി അഡ്വ. സെബാസ്റ്റ്യൻ എം.ജെയുടെ വിജയത്തിനായി ഇന്ന് രാവിലെ ഏഴ് മുതൽ വൈകുന്നേരം ഏഴു വരെയുള്ള സമയത്തിനിടക്ക് മണ്ഡലത്തിലെ എല്ലാ വീടുകളിലും എത്തി വോട്ടഭ്യർഥിക്കുകയെന്ന ബൃഹദ് പ്രചാരണ പരിപാടിയാണ് ആസൂത്രണം ചെയ്തിരിക്കുന്നത്. പതിനായിരത്തിലേറെ പ്രവർത്തകർ വോട്ടർമാരിലേക്ക് വോട്ടഭ്യർഥനയുമായി ഇന്ന് രംഗത്തിറങ്ങുന്നത്. മണ്ഡലത്തിലെ 218 ബൂത്തുകളിലായി ഏകദേശം 10,900 പ്രവർത്തകരാണ് ഇന്ന് പ്രചാരണ രംഗത്ത് സജീവമാകുന്നത്. വർഷങ്ങളായി കൈവിട്ടുപോയ പൂഞ്ഞാർ മണ്ഡലം ഇത്തവണ അഡ്വ. സെബാസ്റ്റ്യൻ എം.ജെയിലൂടെ എങ്ങനേയും തിരിച്ചുപിടിക്കുകയെന്ന ലക്ഷ്യത്തിലാണ് യു.ഡി.എഫ്. തദ്ദേശ സ്വയംഭരണ സ്ഥാപനങ്ങളിൽ മുന്നണിക്കുള്ള മേധാവിത്വവും മണ്ഡലത്തിലെ രാഷ്ട്രീയ സാഹചര്യങ്ങളും തങ്ങൾക്ക് അനുകൂലമാണെന്ന് അവർ അവകാശപ്പെടുന്നു.
കൂട്ടിക്കൽ : നിർത്തിയിട്ടിരുന്ന കാറിന് പിന്നിൽ ബൈക്ക് ഇടിച്ച് യുവാവ് മരിച്ചു. കൈപ്പള്ളി കുന്തൻ പാറ സ്വദേശീ കൊല്ലിയിൽ കെ. എ ജോസഫ് (47) ആണ് മരിച്ചത്. ശനിയാഴ്ച വൈകിട്ട് അഞ്ചുമണിയോടെ ഇളങ്കാട് ഏഴേക്കർ ഭാഗത്തായിരുന്നു അപകടം. മുണ്ടക്കയം ഭാഗത്തേക്ക് വരികയായിരുന്ന ജോസഫിന്റെ ബൈക്ക് നിർത്തിയിട്ടിരുന്ന കാറിന്റെ പിന്നിൽ ഇടിക്കുകയും റോഡിലേക്ക് തെറിച്ച് വീഴുകയായിരുന്നു. തലയിൽ ഗുരുതരമായി പരിക്കേറ്റ ജോസഫിനെ നാട്ടുകാർ ചേർന്ന് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
പാലാ: വാഹന പര്യടനത്തിനിടെ ബിജെപി നേതാവ് കുഴഞ്ഞ് വീണു മരിച്ചു. എസ് സി മോർച്ച എലിക്കുളം പഞ്ചായത്ത് പ്രസിഡൻ്റ് ഒറ്റപ്ലാക്കൽ രാജൻ പി റ്റി (57) ആണ് മരിച്ചത്. പാലാ നിയോജക മണ്ഡലം എൻഡിഎ സ്ഥാനാർത്ഥി അഡ്വ: ഷോൺ ജോർജിൻ്റെ തിരഞ്ഞടുപ്പ് പര്യടനത്തോട് അനുബന്ധിച്ച് നടത്തിയ വാഹന റാലിക്കിടെ കൂരാലി പ്രാവിൻകൂടിന് സമീപം വാഹനത്തിൽ നിന്നും കുഴഞ്ഞ് വീഴുകയായിരുന്നു. ഉടൻ തന്നെ പൊൻകുന്നത്തെ കെ വി എം എസ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ബിജെപിയുടെ പാലാ നിയോജകമണ്ഡലം 215 -ാം നമ്പർ ബൂത്തിൻ്റെ ചുമതലക്കാരനായിരുന്നു. കഴിഞ്ഞ തദേശസ്വയം ഭരണ തിരഞ്ഞെടുപ്പിൽ പാമ്പാടി ബ്ലോക്ക് പഞ്ചായത്തിലേക്ക് എലിക്കുളം ഡിവിഷനിൽ നിന്നും എൻഡിഎ സ്ഥാനാർത്ഥിയായി മത്സരിച്ചിരുന്നു. ഭാര്യ മിനി. മക്കൾ കാർത്തിക്, കാരുണ്യ.
ഈരാറ്റുപേട്ട: പുതുപ്പള്ളി മഖാം ഉറൂസ് നാളെ വിവിധ പരിപാടികളോടെ നടത്തും. പണ്ഡിതന്മാർ, മഹല്ല് ഭാരവാഹികൾ , മഖാം കമ്മിറ്റി ഭാരവാഹികൾ എന്നിവർ പങ്കെടുക്കും. സുബഹി നമസ്കാരാനന്തരം മഖാമിൽ കൂട്ട സിയാറത്ത് നടക്കും. 8 മണി മുതൽ മൗലിദ് പാരായണത്തിന് വി.പി. അബ്ദുൽ ഹമീദ് മൗലവി നേതൃത്വം നൽകും. 9 മണി മുതൽ ദിക്ർ മജ്ലിസ്സ്, 11 മണി മുതൽ പ്രഭാഷണം, ദുആ മജ്ലിസ്സ്, 12 മണിക്ക് അന്നദാനം എന്നീ പരിപാടികളും ഉണ്ടാകും.
ഈരാറ്റുപേട്ട: വിവാഹ വസ്ത്രങ്ങൾ അർഹരായവർക്ക് സൌജന്യമായി നൽകുന്ന സേവനം ചെയ്യുന്ന ഡ്രസ്സ് ബാങ്ക് ഈരാറ്റുപേട്ടയുടെ പുതിയ ഭാരവാഹികളെ തിരഞ്ഞെടുത്തുഫാത്തിമ ശമ്മാസ് (പ്രസിഡന്റ്), റിത ഇർഫാൻ (സെക്രട്ടറി), ഫർസാന ഷാമോൻ (ട്രഷറർ), നേബില ശിഹാബ് (വൈസ് പ്രസിഡന്റ്), അൻസി ഷെർബിൻ (ജനറൽ സെക്രെട്ടറി) എന്നിവരാണ് പുതിയ ഭാരവാഹികൾ.സുമയ്യ നൗഫൽ, ഷൈല അമീർജൻ, മുഹമ്മദ് ഇർഫാൻ, മുഹമ്മദ് റയീസ്, ഷാമോൻ ഷാജഹാൻ എന്നിവർ എക്സിക്യൂട്ടീവ് പാനലിൽ തുടരും. എക്സിക്യൂട്ടീവിലേക്ക് പുതിയ അംഗമായി ഹണി മോൾ കെ.എസ് നെ തെരഞ്ഞെടുത്തു.
തിരുവനന്തപുരം: സംസ്ഥാനത്ത് ഇന്നും നാളെയും ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ്.ശക്തമായ മഴ കണക്കിലെടുത്ത് വിവിധ ജില്ലകളില് യെല്ലോ അലര്ട്ട് പ്രഖ്യാപിച്ചു. ശനിയാഴ്ച പത്തനംതിട്ട, ഇടുക്കി ജില്ലകളിലും ഞായറാഴ്ച പത്തനംതിട്ട, എറണാകുളം, ഇടുക്കി ജില്ലകളിലുമാണ് യെല്ലോ അലര്ട്ട്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില് 64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അര്ത്ഥമാക്കുന്നത്.
ഇടുക്കി ഉറവപ്പാറയിൽ ഇടിമിന്നലേറ്റ് 12 വയസുകാരിയായ പെൺകുട്ടി മരിച്ചു. മൂന്ന് പേർക്ക് പരിക്കേറ്റു. ഇതിൽ ഒരാളുടെ നില ഗുരുതരമാണ്. പെരുമ്പാവൂര് നിന്ന് വന്ന മൂന്ന് പേരും ഇവരെ രക്ഷിക്കാൻ ശ്രമിച്ച തൊടുപുഴ സ്വദേശിയുമാണ് അപകടത്തിൽപ്പെട്ടത്.പെരുമ്പാവൂർ വടക്കനേതിൽ നഫീസത്തുൾ മിസ്റിയയാണ് മരിച്ചത്. മിസ്റിയയുടെ പിതാവ് പെരുമ്പാവൂർ വടക്കനേതിൽ വി.എം അഫ്സൽ, തൊടുപുഴ മങ്ങാട്ടുകവല കളത്തിൽ ഗോകുൽ എസ്. രാജ് എന്നിവർക്കും മറ്റൊരാൾക്കുമാണ് പരിക്കറ്റത്.അപകടത്തിൽപ്പെട്ട എല്ലാവരെയും ഉടൻ തന്നെ തൊടുപുഴയിലെ സ്വകാര്യ ആശുപത്രിയിൽ പ്രവേശിപ്പിച്ചു. നഫീസത്തുൾ മിസ്റിയ അപ്പോഴേക്കും മരിച്ചിരുന്നു. ഗുരുതര പരിക്കറ്റ വി.എം അഫ്സൽ തീവ്രപരിചരണ വിഭാഗത്തിൽ ചികിത്സയിലാണ്. മറ്റ് രണ്ട് പേരുടെയും പരിക്ക് സാരമുള്ളതല്ല.
