പരമ്പരാഗത ശാസ്ത്രത്തിന്റെ- സഹായത്തോടെ ആതുര ശുശ്രൂഷ രംഗത്ത് അതുല്യമായ വ്യക്തിഗത നേട്ടത്തിനും സേവനത്തിനും നാഷണൽ ഇന്റഗ്രേറ്റഡ് ഫെഡറേഷൻ നൽകുന്ന "ആരോഗ്യ രത്ന അവാർഡ് 2024"ന് ഈരാറ്റുപേട്ട സ്വദേശിനി മുഹ്സിന അയൂബ് അർഹയായി. ഹൈദരബാദ് ഭാരതീയ വിദ്യാഭവൻ ഓഡിറ്റോറിയത്തിൽ നടന്ന നാലാമത് അന്താരാഷ്ട്ര സയൻസ് കോൺഫറൻസിൽ വച്ച് മുഹ്സിന പുരസ്കാരം ഏറ്റുവാങ്ങി
കല്പ്പറ്റ: വയനാട്ടിലെ മേപ്പാടി മുണ്ടക്കൈയിലും ചുരല്മലയിലും ഉണ്ടായ വന് ഉരുള്പൊട്ടലില് 292 പേര് മരിച്ചതായി സ്ഥിരീകരിച്ചു. മരിച്ചവരില് നിരവധി കുട്ടികളും ഉള്പ്പെടും. നിരവധി പേരെ കാണാതായി. സ്ഥലത്ത് രക്ഷാപ്രവർത്തനം പുരോഗമിക്കുകയാണ്. മുണ്ടക്കൈയിൽ മാത്രം 400 ഓളം കുടുംബങ്ങളെയാണ് ദുരന്തം ബാധിച്ചിരിക്കുന്നത്. മുണ്ടക്കൽ ഭാഗത്ത് സൈനികരുടെയും സന്നദ്ധ പ്രവർത്തകരുടെയും നേതൃത്വത്തിൽ രക്ഷാപ്രവർത്തനം നടന്നുവരുന്നു
സംസ്ഥാനത്ത് ഇന്ന് സ്വർണവില ഉയർന്നു. ഒരു പവന് സ്വര്ണത്തിന് ഇന്ന് നല്കേണ്ടത് 51600 രൂപയാണ്. കഴിഞ്ഞ ദിവസം 640 രൂപയും ഇന്ന് 400 രൂപയുമാണ് വര്ധിച്ചത്. ഗ്രാമിന് 50 രൂപ വര്ധിച്ച് 6450 രൂപയിലെത്തി. 18 കാരറ്റ് സ്വര്ണം ഗ്രാമിന് 40 രൂപയാണ് വര്ധിച്ചിരിക്കുന്നത്. ഗ്രാമിന് ഇന്ന് നല്കേണ്ട വില 5340 രൂപയാണ്. സംസ്ഥാനത്ത് വെള്ളിയുടെ വില ഗ്രാമിന് 90 രൂപ എന്ന നിരക്കില് തുടരുകയാണ്. അന്താരാഷ്ട്ര വിപണിയിലും സ്വര്ണവില ഉയരുകയാണ്. അതിന്റെ പ്രതിഫലനം വരുംദിവസങ്ങളില് കേരള വിപണിയിലും പ്രകടമാകും. രണ്ട് ദിവസത്തിനിടെ കേരളത്തില് ആയിരത്തിലധികം രൂപയാണ് പവന്മേല് വര്ധിച്ചത്. കഴിഞ്ഞ മാസം കൂടിയ വില രേഖപ്പെടുത്തിയിരുന്നത് 55000 രൂപയാണ്. ഈ മാസം ഇത് മറികടക്കുമോ എന്നാണ് അറിയേണ്ടത്. അതേസമയം സ്വര്ണാഭരണം വാങ്ങാന് ആവശ്യമുള്ളവര് വേഗത്തില് വാങ്ങുന്നതാകും ഉചിതം. അല്ലെങ്കില് അഡ്വാന്സ് ബുക്ക് ചെയ്ത് ഭാവിയിലെ വില വര്ധനവ് ആശങ്ക ഒഴിവാക്കാം
സംസ്ഥാനത്ത് രണ്ടുദിവസം കൂടി ശക്തമായ മഴ തുടരുമെന്ന് കാലാവസ്ഥാ വകുപ്പ് മുന്നറിയിപ്പ്. ഇന്ന് പരക്കെ ശക്തമായ മഴയ്ക്ക് സാധ്യത എന്ന് മുന്നറിയിപ്പ്. തിരുവനന്തപുരം,കൊല്ലം,ആലപ്പുഴ ഒഴികെയുള്ള 11 ജില്ലകളിൽ മഴ മുന്നറിയിപ്പ് നൽകിയിട്ടുണ്ട്. വടക്കൻ കേരളത്തിൽ ഇന്നും അതിശക്തമായ മഴയ്ക്ക് സാധ്യതയെന്നാണ് കാലാവസ്ഥാ വകുപ്പ് പ്രവചിച്ചിരിക്കുന്നത്. വടക്കൻ കേരളത്തിലെ നാല് ജില്ലകളിൽ ഓറഞ്ച് അലർട്ട് പ്രഖ്യാപിച്ചിരിക്കുന്നത്. കോഴിക്കോട്, വയനാട്, കണ്ണൂർ, കാസർഗോഡ് ജില്ലകളിലാണ് ഓറഞ്ച് അലർട്ട് പുറപ്പെടുവിച്ചിരിക്കുന്നത്. പത്തനംതിട്ട, കോട്ടയം, എറണാകുളം, ഇടുക്കി, തൃശ്ശൂർ, പാലക്കാട്, മലപ്പുറം ജില്ലകളിൽ യെല്ലോ അലർട്ട് നൽകിയിട്ടുണ്ട്. വടക്കൻ കേരളത്തിൽ, വയനാട് ഉൾപ്പെടെ അഞ്ചു ജില്ലകളിൽ നാളെയും യെല്ലോ അലർട്ടാണ്.
താമരശ്ശേരി: വയനാട്ടിൽ രക്ഷാപ്രവർത്തനം നടക്കുന സാഹചര്യത്തിൽ വയനാട്ടിലേക്ക് അത്യാവശ്യ മല്ലാത്ത ഒരു വാഹനവും കടത്തിവിടില്ല. ദുരന്തനിവാരണ പ്രവർത്തനം തടസ്സമില്ലതെ നടത്തുന്നതിനും, സൈന്യത്തിൻ്റെയും, രക്ഷാപ്രവർത്തകരുടെയും വാഹനങ്ങൾ സുഗമമായി സഞ്ചരിക്കുന്നതിനും വേണ്ടിയാണ് നടപടി. ആശുപത്രി, എയർപ്പോർട്ട്, റയിൽവേ സ്റ്റേഷൻ തുടങ്ങിയ സ്ഥലങ്ങളിലേക്കുള്ള യാത്രക്കാർക്ക് എന്തെങ്കിലും തടസ്സമോ, ബുദ്ധിമുട്ടോ നേരിടുന്നുണ്ടെങ്കിൽ താമരശ്ശേരി DYSP പി പ്രമോദിനെ നേരിട്ട് വിളിക്കാവുന്നതാണ.നമ്പർ:+91 94979 90122 ഈങ്ങാപ്പുഴയിൽ വാഹന പരിശോധന നടത്താൻ പോലീസ് നിലയുറപ്പിച്ചിട്ടുണ്ട്. വലിയ ചരക്ക് വാഹനങ്ങൾക്ക് ചുരം വഴി താൽക്കാലിക നിരോധനം നിലനിൽക്കുന്നുണ്ട്, അതിനാൽ ഇത്തരം വാഹനങ്ങൾ ഇതുവഴി വരാതിരിക്കുക.
തിരുവനന്തപുരം: സ്കൂളുകളിലെ പഠനസമയത്തില് മാറ്റം കൊണ്ടുവരണമെന്നതുള്പ്പെടെയുള്ള സുപ്രധാന നിര്ദേശങ്ങള് ഉള്ക്കൊള്ളുന്ന ഖാദര് കമ്മിറ്റി റിപ്പോര്ട്ടിന് മന്ത്രിസഭാ യോഗത്തിന്റെ അംഗീകാരം. സ്കൂളുകളിലെ പഠനസമയം രാവിലെ എട്ടു മുതല് ഉച്ചയ്ക്ക് ഒന്നു വരെയാക്കണമെന്ന നിര്ദേശമാണ് ഡോ.എം.എ. ഖാദര് അധ്യക്ഷനായി സര്ക്കാര് നിയോഗിച്ച സമിതിയുടെ രണ്ടാം റിപ്പോര്ട്ടിലെ നിര്ദേശം. അതേസമയം പ്രാദേശിക ആവശ്യങ്ങള് പരിഗണിച്ച് സ്കൂളുകള്ക്കു സമയം ക്രമീകരിക്കാമെന്നും റിപ്പോര്ട്ടിലെ നിര്ദേശങ്ങള് ഓരോന്നും പ്രത്യേകമായി പരിശോധിച്ചു മാത്രമേ തീരുമാനം എടുക്കാവൂ എന്ന വ്യവസ്ഥയോടെയാണു റിപ്പോര്ട്ടിനു മന്ത്രിസഭായോഗം തത്വത്തില് അംഗീകാരം നല്കിയത്. പ്രീ സ്കൂളുകള്, അങ്കണവാടികള് എന്നിവയുടെ പഠനസമയം പ്രാദേശിക സമൂഹം തീരുമാനിക്കുന്നതായിരിക്കും ഉചിതമെന്നാണു നിര്ദേശം. നാലു-നാലര മണിക്കൂര് പ്രവര്ത്തിക്കണമെന്ന് തീരുമാനിച്ചാല് മതി. പഠനസമയത്തിനു പുറമേ രണ്ടു മുതല് നാലുവരെ കലാകായിക അഭിരുചി പ്രവര്ത്തനങ്ങള്ക്കും ലൈബ്രറി, ലബോറട്ടറി, തൊഴില് വിദ്യാഭ്യാസം തുടങ്ങിയവയ്ക്കുമാ യി വിനിയോഗിക്കാം. എന്നാല്, നിലവിലെ സാമൂഹിക സാഹചര്യം ഇത്തരമൊരു സമയമാറ്റത്തിനു പരുവപ്പെട്ടിട്ടുണ്ടോയെന്ന് വിശദമായി പരിശോധിച്ച് ആവശ്യമായ ചര്ച്ചകള്ക്കു ശേഷമേ തീരുമാനമെടുക്കാവൂ എന്നും ശനിയാഴ്ചകള് കുട്ടികളുടെ സ്വാതന്ത്ര്യദിനമായി മാറണമെന്നും റിപ്പോര്ട്ടില് വ്യക്തമാക്കിയിട്ടുണ്ട്. അധ്യാപകരുടെ സ്ഥാനക്കയറ്റം സീനിയോറിറ്റി അടിസ്ഥാനത്തില് നടത്തുന്നതിനു പകരം കഴിവും അഭിരുചിയും പരിഗണിച്ചു നടത്തണമെന്നും റിപ്പോര്ട്ടില് നിര്ദേശിച്ചിട്ടുണ്ട്. ഇതു നടപ്പാക്കുമ്പോള് സുതാര്യമായി വേണമെന്നും അതിനു കഴിയുന്ന തരത്തിലുള്ള സംവിധാനം ഏര്പ്പെടുത്തണമെന്നും നിര്ദേശമുണ്ട്. അധ്യാപക തസ്തികനിര്ണയം കാലോചിതമായി പരിഷ്കരിക്കണം, പഠനമാധ്യമം മാതൃഭാഷയാകണം, ഇംഗ്ലീഷ് പഠനം മെച്ചപ്പെടുത്തണം തുടങ്ങിയ നിര്ദേശങ്ങളും റിപ്പോര്ട്ടിലുണ്ട്. പാഠ്യേതര മേഖലയിലെ മികവിനു നല്കുന്ന ഗ്രേസ് മാര്ക്ക് തുടരണമെന്നു നിര്ദേശിക്കുന്ന റിപ്പോര്ട്ടില് ഗ്രേസ് മാര്ക്കിനു നിയന്ത്രണം കൊണ്ടുവരണമെന്നും വ്യക്തമാക്കിയിട്ടുണ്ട്. കമ്മിറ്റി റിപ്പോര്ട്ടില് ഉള്പ്പെട്ടിട്ടുള്ള നിര്ദേശങ്ങള് പലതും വിവാദമാകാനിടയുള്ളതിനാല് പരിശോധിച്ചു മാത്രമേ നടപ്പിലാക്കാവൂ എന്നാണ് തത്വത്തില് അംഗീകരിച്ചിട്ടുള്ളത്. അതിനാല് ഓരോ നിര്ദേശവും നടപ്പാക്കുന്നതിനു മന്ത്രിസഭയുടെ ഉള്പ്പെടെ പ്രത്യേക അംഗീകാരം ആവശ്യമായി വരും.
ഈരാറ്റുപേട്ട പൗരാവലി വയനാട്ടിലേക്ക് ഉള്ള വിഭവ ശേഖരണം നടക്കുന്ന കൗണ്ടറിൽ സെബാസ്റ്റ്യൻ കുളത്തുങ്കൽ MLA സന്ദർശിക്കുകയും വേണ്ട നിർദ്ദേശങ്ങൾ കൊടുക്കുകയും ചെയ്തു, ഈരാറ്റുപേട്ട പൗരവലിക്ക് ഉള്ള പൂർണ്ണ പിന്തുണയും അദ്ദേഹം അറിയിച്ചു.
തിരുവനന്തപുരം: ഇന്ത്യയില് കൂടുതല് ഉരുള്പൊട്ടല് സാധ്യതയുള്ള 30 ജില്ലകളില് 10 എണ്ണം കേരളത്തിലാണെന്ന് പഠനങ്ങൾ. പട്ടികയില് വയനാട് 13-ാം സ്ഥാനത്താണ്. പശ്ചിമഘട്ടത്തിലെയും കൊങ്കണ് കുന്നുകളിലെയും (തമിഴ്നാട്, കേരളം, കര്ണാടക, ഗോവ, മഹാരാഷ്ട്ര) 0.09 ദശലക്ഷം ചതുരശ്ര കിലോമീറ്റര് ഉരുള്പൊട്ടല് സാധ്യതയുള്ളതായി ഇന്ത്യന് സ്പേസ് റിസര്ച്ച് ഓര്ഗനൈസേഷന്റെ (ഐഎസ്ആര്ഒ) നാഷണല് റിമോട്ട് സെന്സിങ് സെന്റര് കഴിഞ്ഞ വര്ഷം പുറത്തിറക്കിയ അറ്റ്ലസിൽ വ്യക്തമാക്കുന്നു. പരിസ്ഥിതി ദുര്ബലമായ പശ്ചിമഘട്ടത്തിലെ അധിവാസവും കെട്ടിടങ്ങളും മേഖലയെ കൂടുതല് ദുര്ബലപ്പെടുത്തുന്നു. പ്രത്യേകിച്ചും, കേരളത്തില് പശ്ചിമഘട്ട മേഖലയില് ജനസാന്ദ്രതയും ഗാര്ഹിക സാന്ദ്രതയും വളരെ ഉയര്ന്ന നിലയിലാണെന്നും റിപ്പോര്ട്ടില് ചൂണ്ടിക്കാണിക്കുന്നു. 2021-ല് സ്പ്രിംഗര് പ്രസിദ്ധീകരിച്ച പഠനത്തില്, കേരളത്തിലെ എല്ലാ ഉരുള്പൊട്ടല് ഹോട്ട്സ്പോട്ടുകളും പശ്ചിമഘട്ട മേഖലയിലാണെന്ന് വ്യക്തമാക്കുന്നു. അത് ഇടുക്കി, എറണാകുളം, കോട്ടയം, വയനാട്, കോഴിക്കോട്, മലപ്പുറം ജില്ലകളിലാണ് കേന്ദ്രീകരിച്ചിരിക്കുന്നതെന്നും റിപ്പോര്ട്ട് ചൂണ്ടിക്കാട്ടുന്നു.
