പൂഞ്ഞാർ ഗ്രാമപഞ്ചായത്ത് കാര്യാലയത്തിന്റെ പുതിയ മന്ദിര ഉത്ഘാടനം ശ്രീ സെബാസ്റ്റ്യൻ എം.ജെ എം എൽ എ നിർവഹിച്ചു.പഞ്ചായത്തിലെ മുതിർന്ന അധ്യാപകരെയും, വിവിധ സ്കൂളുകളിൽ പഠിച്ച് SSLC പരീക്ഷയിൽ ഉന്നത വിജയം കൈവരിച്ച മുഴുവൻ വിദ്യാർത്ഥികളെയും ചടങ്ങിൽ ആദരിച്ചു.വിദ്യാഭ്യാസരംഗത്തു കുട്ടികളെ മുന്നോട്ട് നയിച്ച അധ്യാപകരെയും എംഎൽഎ പ്രശംസിച്ചു.
ഈരാറ്റുപേട്ട: എങ്ങനെ നല്ലൊരു ജനപ്രതിനിധിയാകാം എന്ന വിഷയത്തിൽ ഹൈക്കോടതി അഭിഭാഷകനും കേരള സിവിൽ സൊസൈറ്റി മൂവ്മെൻ്റ് ചെയർമാനുമായ അഡ്വ.ജോൺ ജോസഫ് ഈരാറ്റുപേട്ട നഗരസഭാംഗങ്ങൾക്ക് ബോധവൽക്കരണ,ചർച്ചാ ക്ലാസ് നടത്തി.നഗരസഭാ ചെയർമാൻ അഡ്വ. വി പി നാസർ അധ്യക്ഷത വഹിച്ചു.സിവിൽ സൊസൈറ്റി മൂവ്മെൻ്റ് പ്രതിനിധി വി എം അബ്ദുള്ള ഖാൻ ആമുഖ പ്രസംഗം നടത്തി. നഗരസഭാംഗങ്ങൾ ചർച്ചയിൽ പങ്കെടുത്തു സംസാരിച്ചു.
കാഞ്ഞിരപ്പള്ളി : സമസ്ത കേരള ജംഇയ്യത്തുൽ ഉലമയുടെ മെമ്പർഷിപ്പ് കാമ്പയിന്റെ ഭാഗമായി കാഞ്ഞിരപ്പള്ളി അൽബാബ് ഓഡിറ്റോറിയത്തിൽ സമസ്ത കോട്ടയം ജില്ലാ ശില്പശാല ജില്ലാ വൈസ് പ്രസിഡന്റ് അബ്ദുല്ലത്തീഫ് മുസ്ലിയാരുടെ അധ്യക്ഷതയിൽ നടന്നു. സെന്റീനറി എക്സിക്യൂട്ടീവ് കൗൺസിൽ ചെയർമാൻ കെ എസ് എം റഫീഖ് അഹ്മദ് സഖാഫി ഉദ്ഘാടനം നിർവഹിച്ചു.ജില്ലയിലെ ബിരുദധാരികളായ മുഴുവൻ പണ്ഡിതരും മെമ്പർഷിപ്പ് മുഖേന സമസ്തയിൽ അംഗമാകും. മെമ്പർഷിപ്പ് പ്രവർത്തനങ്ങൾക്ക് നേതൃത്വം നൽകുന്നതിനായി പിഎം അനസ് മദനി ജില്ലാ മുശ് രിഫ് ആയി ഏഴംഗ സമിതിയെയും സമ്മേളന പ്രചരണത്തിനായി കെ എസ് എം റഫീഫ് അഹ്മദ് സഖാഫി ചെയർമാനും മുഹമ്മദ് ലബീബ് അസ്ഹരി കൺവീനറുമായി 25 അംഗ എക്സിക്യൂട്ടീവ് കൗൺസിലും തെരഞ്ഞെടുത്തു. "നൂറ് പ്രകാശ വർഷങ്ങൾ" എന്ന പ്രമേയത്തിൽ ജനുവരിയിൽ മലപ്പുറം വാദി ഹറമൈനിൽ നടക്കുന്ന സെന്റീനറി ആഘോഷങ്ങളുടെ ജില്ലാ തല പചരണത്തിന്റെ ഭാഗമായി ജൂൺ മാസത്തിൽ പ്രമേയ സമ്മേളനവും ടേബിൾ ടോക്കും, ഈരാറ്റുപേട്ട, തലയോലപ്പറമ്പ്, ചങ്ങനാശ്ശേരി സോണുകളിൽ ആദർശ സമ്മേളനങ്ങളും നടക്കും. സംസ്ഥാന, ജില്ലാ നേതാക്കൾ പങ്കെടുക്കും, വി എച് അബ്ദുൽറഷീദ് മുസ്ലിയാർ, അബ്ദുസ്സലാം ബാഖവി, അബ്ദുറഹ്മാൻ മുസ്ലിയാർ. അലി മുസ്ലിയാർ, ഹാരിസ് സഖാഫി, അബ്ദുറഹ്മാൻ സഖാഫി, ഇയാസ് സഖാഫി, സൈനുദ്ധീൻ മുസ്ലിയാർ, അൻവർ മദനി, റഫീഖ് ലത്തീഫി, ഹക്കീം സഖാഫി, പി എം അനസ് മദനി,ഷാഫി സഖാഫി ഷാജഹാൻ സഖാഫി എന്നിവർ സംസാരിച്ചു.
ഈരാറ്റുപേട്ട: ഫൈൻ ആർട്സ് ക്ലബ് ഈരാറ്റുപേട്ടയുടെ (FACE) 28-ാമത് വാർഷികാഘോഷ പരിപാടികൾ 'സർഗ്ഗസമീക്ഷ '26' എന്ന പേരിൽ മെയ് 23, 24 (ശനി, ഞായർ) തീയതികളിൽ നടക്കും. ഈരാറ്റുപേട്ട ബറക്കാത്ത് സ്ക്വയർ, മുട്ടം ജംഗ്ഷൻ എന്നിവിടങ്ങളിലാണ് രണ്ട് ദിവസത്തെ സാംസ്കാരികോത്സവം സംഘടിപ്പിച്ചിരിക്കുന്നത്. നാളെ (ശനിയാഴ്ച) നടക്കുന്ന ഔദ്യോഗിക ഉദ്ഘാടന സമ്മേളനം ഈരാറ്റുപേട്ട മുനിസിപ്പൽ ചെയർപേഴ്സൺ അഡ്വ. വി. പി. നാസർ നിർവഹിക്കും. കുട്ടികളുടെ വിവിധ കലാപ്രകടനങ്ങൾ കോർത്തിണക്കിയ 'അരങ്ങ്' പരിപാടിയുടെ ഭാഗമായിരിക്കും. ഉച്ചക്ക് ശേഷം ഈരാറ്റുപേട്ടയുടെ സാംസ്കാരിക പൈതൃകവും ചരിത്രവും ചർച്ച ചെയ്യുന്ന 'ദേശപ്പെരുമ' എന്ന സാംസ്കാരിക സംഗമം പ്രമുഖ ഫാമിലി തെറാപ്പിസ്റ്റും എഴുത്തുകാരനുമായ ശ്രീ. അലക്സ് ടെസി ജോസ് ഉദ്ഘാടനം ചെയ്യും. വൈകുന്നേര് പുതുമയാർന്ന കരോക്കേ ഗാനാലാപന മത്സരമായ 'ശ്രുതിലയം' നടക്കും. ഞായറാഴ്ച രാവിലെ നടക്കുന്ന സാഹിത്യ ശില്പശാലയായ 'മൊഴിപടവ്' എഴുത്തുകാരൻ ശ്രീ. ഹമീദ് പറപ്പൂര് ഉദ്ഘാടനം ചെയ്യും. പ്രശസ്ത എഴുത്തുകാരൻ ശ്രീ. അർഷാദ് ബെത്തേരി ശില്പശാലയ്ക്ക് നേതൃത്വം നൽകും. ഉച്ചകഴിഞ്ഞ് സ്ത്രീ ശാക്തീകരണ പ്രമേയങ്ങൾ ചർച്ച ചെയ്യുന്ന 'പെണ്ണകം' വനിതാ സംഗമത്തിൽ പ്രശസ്ത എഴുത്തുകാരി എസ്. സരോജം, പാലാ മുൻസിപ്പൽ ചെയർപെഴ്സൺ കുമാരി ദിയ ബിനു തുടങ്ങിയവർ പങ്കെടുക്കും.രണ്ടു ദിവസത്തെ സാംസ്കാരികോത്സവത്തിന്റെ സമാപന സമ്മേളനം വൈകുന്നേരം 7 മണിക്ക്.മുട്ടം ജംഗ്ഷനിൽ അഡ്വ. എം. ജെ. സെബാസ്റ്റ്യൻ എം.എൽ.എ ഉദ്ഘാടനം ചെയ്യും. ഫെയ്സ് പബ്ലിക്കേഷൻസ് പുറത്തിറക്കുന്ന മൂന്ന് പുസ്തകങ്ങളുടെ പ്രകാശനം ചടങ്ങിൽ നടക്കും. ജാഫർ ഈരാറ്റുപേട്ടയുടെ 'നടനവും കഥനവും', മനാഫ് നെടുങ്കീന്തിയുടെ 'അറുപത് തിരിയിട്ട നിലവിളക്ക്', ഫെയ്സിന്റെ വാർഷിക സ്മരണികയായ 'വഴിയടയാളം' എന്നിവയാണ് പ്രകാശനം ചെയ്യുന്നത്. വിവിധ മേഖലകളിൽ കഴിവ് തെളിയിച്ച പ്രതിഭകളെ ചടങ്ങിൽ ആദരിക്കും. തുടർന്ന് ഏഷ്യാനെറ്റ് മൈലാഞ്ചി ഫെയിം ഹാഷിം ആലപ്പുഴ, ഫെയ്സിന്റെ പ്രിയ ഗായകൻ നിഷാന്ത് പത്മനാഭൻ, അമൃത ടിവി സൂപ്പർ സ്റ്റാർ ഫെയിം കുമാരി ദേവിക എസ്. നായർ എന്നിവർ നയിക്കുന്ന 'ഫെയ്സ് വോയ്സ്' ഗാനമേളയും അരങ്ങേറും. വിവിധ സമ്മേളനങ്ങളിൽ ഫെയ്സ് പ്രസിഡന്റ് കെ.പി.എ. നടക്കൽ, ജനറൽ സെക്രട്ടറി ഹാഷിം ലബ്ബ, ട്രഷറർ പി.പി.എം. നൗഷാദ്, ഡയറക്ടർ സക്കീർ താപി തുടങ്ങിയവർ സംസാരിക്കും.
തീക്കോയി: ആസിഡൊഴിച്ചതിനെ തുടർന്ന് പൊള്ളലേറ്റ് ചികിത്സയിലായിരുന്ന സ്ത്രീ മരിച്ച സംഭവത്തിൽ ഭർത്താവ് അറസ്റ്റിൽ. തീക്കോയി കൊല്ലംപാറ പൊട്ടംപ്ലാക്കൽ ജോണിന്റെ ഭാര്യ ബാലാമണി (50) മരിച്ച സംഭവത്തിലാണ് ഭർത്താവ് ജോൺ (47) നെ ഈരാറ്റുപേട്ട പോലീസ് അറസ്റ്റു ചെയ്തത്. കട്ടൻസ് തൊഴിലാളിയാണ് ഇയാൾ. കഴിഞ്ഞ വെള്ളിയാഴ്ച രാവിലെ 11 മണിയോടെയാണു സംഭവം. ഈ സമയം വീട്ടിൽ ആരും ഇല്ലായിരുന്നു. കുടുംബ വഴക്കിനെത്തുടർന്നാണ് ജോൺ ബാലാമണിയുടെ ദേഹത്ത് ആസിഡൊഴിച്ചത്. സാരമായി പൊള്ളലേറ്റു കോട്ടയം മെഡിക്കൽ കോളജിൽ ചികിത്സയിലായിരുന്ന ബാലാമണി ബുധനാഴ്ച രാവിലെയാണ് മരിച്ചത്. ബുധനാഴ്ച വൈകിട്ടു തന്നെ ജോണിനെ പോലീസ് അറസ്റ്റു ചെയ്തു. ഇയാളെ റിമാൻഡു ചെയ്തു. ബാലാമണിയുടെ സംസ്ക്കാരം നടത്തി. ഈരാറ്റുപേട്ടയിലെ സ്വകാര്യ തയ്യൽ സ്ഥാപനത്തിൽ ജോലി ചെയ്തു വരികയായിരുന്നു ബാലാമണി.
ഈരാറ്റുപേട്ട:ഈരാറ്റുപേട്ടയുടെ സാംസ്കാരിക കൂട്ടായ്മയായ 'ഫെയ്സ്' (FACE) പുസ്തക പ്രസാധന രംഗത്തേക്ക് ചുവടുവെക്കുന്നു. ഫെയ്സ് പബ്ലിക്കേഷന്റെ ആദ്യ സംരംഭമായി, ഈരാറ്റുപേട്ട സ്വദേശിയായ കവി എം. എ. മനാഫ് നെടുങ്കീന്തി രചിച്ച 'അറുപത് തിരിയിട്ട നിലവിളക്ക്' എന്ന കവിതാസമാഹാരത്തിന്റെ കവർ പേജ് പ്രകാശനം ചെയ്തു. പ്രശസ്ത കവയിത്രി ശ്രീമതി. വിഷ്ണുപ്രിയ പൂഞ്ഞാറാണ് പ്രകാശന കർമ്മം നിർവ്വഹിച്ചത്. 2026 മേയ് 17 ഞായറാഴ്ച രാവിലെ പൂഞ്ഞാർ ശ്രീ അവിട്ടം തിരുനാൾ സ്മാരക ഗ്രന്ഥശാലയിൽ വെച്ചായിരുന്നു ചടങ്ങ്. ലൈബ്രറി പ്രസിഡന്റ് ശ്രീ. സുരേഷ് കുമാർ ചടങ്ങിൽ അധ്യക്ഷത വഹിച്ചു. ഫെയ്സ് ഡയറക്ടർ ശ്രീ. സക്കീർ താപി, പ്രസിഡന്റ് ശ്രീ. കെ.പി. എ നടയ്ക്കൽ, ഫെയ്സ് വിമൻസ് ക്ലബ് വൈസ് പ്രസിഡന്റ് ശ്രീമതി. മേരികുട്ടി കുര്യാക്കോസ് എന്നിവർ ചടങ്ങിൽ ആശംസകൾ അർപ്പിച്ചു സംസാരിച്ചു. കവി മനാഫ് നെടുങ്കീന്തി ചടങ്ങിൽ നന്ദി രേഖപ്പെടുത്തി.വിവിധ പ്രമേയങ്ങളിലുള്ള 62 കവിതകൾ ഉൾക്കൊള്ളുന്ന ഈ കവിതാസമാഹാരം ഈ മാസം തന്നെ വായനക്കാരിലേക്ക് എത്തും.
തലപ്പലം: തലപ്പലം ഗ്രാമപഞ്ചായത്തിലെ മുഴുവൻ ആശാവർക്കർമാരേയും, ഹരിതകർമ്മഗംങ്ങളെയും, പാലിയേറ്റിവ് നഴ്സ് റീനായെയും ലയൺസ് ക്ലബ് ഓഫ് അടൂർ എമിറേറ്റ്സിൻ്റെ നേതൃത്വത്തിൽ ആദരിക്കുകയും ഭക്ഷ്യകിറ്റുകൾ വിതരണം ചെയ്യുകയും ചെയ്തു. നിയുക്ത എം എൽ എ യ്ക്കും ഗ്രാമപഞ്ചായത്ത് പ്രസിഡന്റിനും സ്വീകരണം നൽകി. പരിപാടിയുടെ ഉദ്ഘാടനം ഗ്രാമപഞ്ചായത്ത് പ്രസിഡന്റ് ശ്രീമതി. ജോമി ബെന്നിയുടെ അദ്ധ്യക്ഷതയിൽ നിയുക്ത പൂഞ്ഞാർ എം എൽ എ എം. ജെ.സെബാസ്റ്യൻ ( സജി ജോസഫ്) നിർവ്വഹിച്ചു. ലയൺസ് ജില്ലാ ചീഫ് പ്രോജക്ട് കോഡിനേറ്റർ സിബി മാത്യു പ്ലാത്തോട്ടം മുഖ്യപ്രഭാഷണം നടത്തി. പഞ്ചായത്ത് വൈസ് പ്രസിഡന്റ് ജോയി ജോസഫ് ആശംസകൾ അർപ്പിച്ചു. പഞ്ചായത്ത് ഭരണസമിതി അംഗങ്ങളും സ്റ്റാഫ് അംഗങ്ങളും യോഗത്തിൽ പങ്കെടുത്തു.
കോട്ടയം: വിസ്ഡം ഇസ്ലാമിക് യൂത്ത് ഓർഗനൈസേഷന്റെ ആഭിമുഖ്യത്തിൽ സംഘടിപ്പിക്കുന്ന ഡയലോഗ് 12.0 ൻ്റെ പ്രചാരണത്തിൻ്റെ ഭാഗമായി സന്ദേശ പ്രയാണത്തിന് തുടക്കമായി. ഈരാറ്റുപേട്ടയിൽ നിന്നാരംഭിച്ച് ജില്ലയുടെ വിവിധ പ്രദേശങ്ങളിൽ പര്യടനം നടത്തി വ്യാഴാഴ്ച വൈകിട്ട് ഡയലോഗ് നഗരിയിൽ പ്രയാണം സമാപിക്കും. വ്യത്യസ്ത വിഷയങ്ങളിൽ വിവിധ ജില്ലകളിൽ നടന്ന ഡയലോഗുകൾക്ക് ശേഷമാണ് പന്ത്രണ്ടാമത് ഡയലോഗ് 14 ന് വൈകിട്ട് നാലിന് ഈരാറ്റുപേട്ട ബറക്കാത്ത് സ്ക്വയർ ഓഡിറ്റോറിയത്തിൽ സംഘടിപ്പിക്കുന്നത്. മരണത്തോടെ അവസാനിക്കുമെങ്കിൽ നാം എന്തിന് ഇവിടെ എന്ന പ്രമേയത്തിലാണ് ഡയലോഗ് 12.0 സംഘടിപ്പിക്കുന്നത്. സന്ദേശ പ്രയാസം വിസ്ഡം യൂത്ത് സംസ്ഥാന വൈസ് പ്രസിഡൻ്റ് ജംഷീർ സ്വലാഹി ഉദ്ഘാടനം ചെയ്തു. സംസ്ഥാന സെക്രട്ടറി അബ്ദുൽ ഖാലിക്, സ്റ്റേറ്റ് ഇവൻ്റ് കൺവീനർ ഹാഷിർ അക്ബർ, വിസ്ഡം ഇസ്ലാമിക് ഓർഗനൈസേഷൻ ജില്ലാ പ്രസിഡൻ്റ് നൗഷാദ് കെ എം , ജില്ലാ സെക്രട്ടറി ഷമീൽ എൻ എ, യൂത്ത് ഓർഗനൈസേഷൻ ജില്ലാ സെക്രട്ടറി സിയാദ് പി ഇ എന്നിവർ സംസാരിച്ചു.
